މޮޒަމްބިކްގައި އިންތިޚާބާ ގުޅިގެން ހަމަނުޖެހުން އުފެދި ޖަލަކުން 1،500 ގައިދީން ފިލައިގެން ގޮސްފައިވާ ކަމަށް ފުލުހުން ބުނެއެވެ.
ވެރިރަށް މަޕޫޓޯއާ ގާތްގަނޑަކަށް 15 ކިލޯމީޓަރު (ނުވަ މޭލު) ދުރުގައި އޮންނަ ހައި ސެކިއުރިޓީ ޖަލަކުން ޖުމްލަ 1،534 މީހުން ފިލާފައިވާ ކަމަށް ނޫސްވެރިންގެ ބައްދަލުވުމެއްގައި ފުލުހުން ބުނެފައިވެ އެވެ.
ފިލަން އުޅުނު މީހުންނާ ޖަލު ބަލަހައްޓާ މީހންގެ ކުރިމަތިލުންތަކުގައި 33 މީހަކު މަރުވެ 15 މީހަކު ޒަހަމްވެފައިވާ ކަމަށް ވެސް ފުލުހުން ބުނެއެވެ.
ފަހުން ސިފައިންގެ ތާއީދާއެކު ހިންގި އޮޕަރޭޝަނެއްގައި ފިލައިގެން އުޅުނު 150 އެއްހާ މީހުން ހައްޔަރުކޮށްފައިވެއެވެ. ފިލައިގެން ދިޔަ ބައެއް މީހުންނަކީ، ހަތް އަހަރު ކުރިން ހިނގި ހަމަނުޖެހުންތަކެއްގެ ފަހަތުގައި ތިބި ހަތިޔާރު އެޅި ޖަމާއަތްތަކާ ގުޅުން ހުރި މީހުންނެވެ.
ޕޯޗުގަލް ބަހުން ވާހަކަ ދައްކާ އެފްރިކާގެ މޮޒަމްބިކްގެ އެންމެ މަތީ ކޯޓުން ހޯމަ ދުވަހު ވަނީ 1975 ވަނަ އަހަރުން ފެށިގެން ވެރިކަން ކުރަމުންދާ ފްރެލިމޯ ޕާޓީން އިންތިޚާބު ކާމިޔާބު ކުރިކަމަށް ބުނެފައެވެ. އޮބްޒާވަރުން ބުނެފައި ވަނީ އިންތިޚާބުގައި ގަވާއިދާ ހިލާފު ކަންތައްތަކެއް ހިނގާފައިވާ ކަމަށެވެ.
ފްރެލިމޯގެ ލީޑަރު ޑޭނިއަލް ޗަޕޯއަށް 65.17 އިންސައްތަ ވޯޓު ލިބިވަޑައިގަތް ކަމަށް އިލެކްޝަންސް ކޮމިޝަނުން ނިންމާފައި ވެއެވެ.
ޗާޕޯގެ ވާދަވެރިޔާ ގައުމުން ބޭރުގައި އަރުވާލެވިގެން ހުންނެވި އިދިކޮޅު ލީޑަރު ވެނަންސިއޯ މޮންޑްލޭން ވަނީ އިންތިޚާބު އޮޅުވާލާފައިވާ ކަމަށް ވިދާޅުވެފަ އެވެ.
