ކޮރެއާގެ މެދުތެރޭގައި އޮންނަ ސިޓީއެއް ކަމަށްވާ ޗުންގްޖޫގައި ހައިޑްރޯޖަން ބަހެއް ގޮވުމުން ސަލާމަތީ ކަންބޮޑުވުންތަކެއް އުފެދިއްޖެ އެވެ. މި ގޮވުމުގައި އެ ސިޓީގެ ޗާޖިން ސްޓޭޝަންގެ އޮފިޝަލަކާއި ދެ މުވައްޒަފަކަށް އަނިޔާވެފައި ވެއެވެ. މިކަން ދިމާވީ، ބަސް ޗާޖު ކުރުމަށްފަހު އިންޖީނު ސްޓާޓް ކުރަން އުޅެނިކޮށެވެ.
ކޮރެއާ ގޭސް ސޭފްޓީ ކޯޕަރޭޝަން (ކޭޖީއެސް) އިން ވަނީ ވަގުތުން މައްސަލަ ބަލަން ފަށާފައެވެ. އަދި އެކަމާ ގުޅިގެން ޗުންގްޖޫގައި ހައިޑްރޯޖަން އިން ދުއްވާ ހުރިހާ ބަހެއްގެ އޮޕަރޭޝަން ވަނީ ހުއްޓާލާފަ އެވެ. މުޅި ސިޓީގައި ޖުމުލަ 18 ބަސް ހައިޑްރޮޖަން އިން ދުއްވައެވެ.
ކޭޖީއެސް އާއި ދާއިރާގެ ތަޖުރިބާކާރުން ބުނާ ގޮތުގައި ކޮރެއާގައި ހައިޑްރޯޖަން ފިއުލް ސެލް ވެހިކަލް ބޭނުން ކުރާތާ 10 އަހަރު ވެފައިވާ އިރު މިއީ މިފަދަ ހާދިސާއެއް ހިނގި ފުރަތަމަ ފަހަރު ކަމަށެވެ.
ކޮރެއާގައި 40 ހާހެއްހައި ވެހިކަލް ހައިޑްރޮޖަން ފިއުލް ބޭނުންކޮށްގެން ދުއްވައެވެ.
