ރާއްޖެ އެތެރެކުރަން އުޅުނު 2.4 ކިލޯގެ މަސްތުވާތަކެތި އަތުލައިގެންފިއެވެ.
މޯލްޑިވްސް ކަސްޓަމްސް ސާވިސްއިން މިކަން ހާމަކޮށްފައިވަނީ ރޭ "އެކްސް" ގައި ކުރި ޕޯސްޓެއްގައެވެ.
އެޕޯސްޓެއްގައި ކަސްޓަމްސްއިން ބުނީ އެތަކެތި އަތުލައިގެންފައިވަނީ ވެލާނާ އިންޓަނޭޝަނަލް އެއާޕޯޓުން މި މަހުގެ 26 ވަނަ ދުވަހު ތައިލޭންޑުން ރާއްޖެއައި އުމުރުން 41 އަހަރާއި 21 އަހަރުގެ ދިވެހި ދެ ފިރިހެން ފަސިންޖަރުންގެ އަމަލުތައް ހުރިގޮތުން އެ މީހުން އިތުރަށް ބަލާ ފާސްކުރި ކަމަށެވެ.
އެގޮތުން އަތުލައިގެން ތަކެތީގެ ތެރޭގައި ހެރޮއިންގެ 0.32 ކިލޯއާއި މެފެޑްރޯންގެ 2.1 ކިލޯ ހިމެނޭ ކަމަށް ވެސް ކަސްޓަމްސްއިން ބުނެފައިވެއެވެ. އަދި ތަކެތީގެ ބަރުދަނުގައި ޕެކިންއާއި އެކު ޖުމްލަ 2.4 ކިލޯ ހުރިއިރު، މިތަކެތީގެ މަގުމަތީ އަގަކީ ގާތްގަނޑަކަން 5.5 މިލިއަން ދިވެހި ރުފިޔާކަމަށް ލަފާކުރެވޭކަމަށް ވެސް ކަސްޓަމުން ބުންޏެވެ.
މީގެއިތުރުން ކަސްޓަމުން ބުނީ އެ މައްސަލަ އިތުރަށް ތަހުގީގު ކުރުމަށްޓަކައި، މައްސަލައިގައި އަތުލައިގަނެވުނު މަސްތުވާތަކެއްޗާއި މައްސަލައިގައި ޝާމިލުވާ ދެ ފަސިންޖަރުން ފުލުހުންނާ ހަވާލުކޮށްފައިވާ ކަމަށެވެ.
