އިނގިރޭސި ޕްރިމިއަރ ލީގުގައި ރޭ ވެސްޓްހޭމް 5-0 އިން ބަލިކޮށް ލިވަޕޫލުން ތާވަލުގެ އެއްވަނައިގައި 8 ޕޮއިންޓުގެ ލީޑެއް ނަގައިފިއެވެ.
ވެސްޓްހޭމުގެ ދަނޑުގައި ކުޅުނު މިމެޗުގައި ލިވަޕޫލުން ލީޑް ނެގީ ކޮލަމްބިއާގެ ވިންގަރ ލުއިޒް ޑިއާޒްގެ ލަނޑުން 30 ވަނަ މިނެޓުގައެވެ. ފުރަތަމަ ހާފު ނިމުމުގެ ކުރިން ލިވަޕޫލަށް ލީޑް ފުޅާކޮށްދިނީ ނެދަލޭންޑްސްގެ ވިންގަރ ކޯޑީ ގަކްޕޯ އާއި މިސްރުގެ ތަރި މުހައްމަދު ސަލާހެވެ. ލިވަޕޫލުގެ އަނެއް ދެލަނޑު ދެވަނަ ހާފުގައި ކާމިޔާބު ކޮށްދިނީ އިނގިރޭސި ޑިފެންޑަރު އެލެގްޒެންޑަރ އާނޯލްޑާއި ޕޯޗުގަލްގެ ފޯވާޑް ޑިއޭގޯ ޖޮޓާއެވެ.
މިމެޗުގައި ސަލާހް ޖެހި ލަނޑާއި، ލަނޑު ޖަހަން ކޮށްދިން އެސިސްޓާއެކު އޭނާވެފައި ވަނީ ޕްރިމިއަރ ލީގުގެ ތާރިހުގައި އެއް ސީޒަނެއްގެ ތަފާތު 8 މެޗުގައި ލަނޑު ޖަހައި އަދި އެސިސްޓްކޮށްދިން ފުރަތަމަ ކުޅުންތެރިޔާ ކަމުގައެވެ. މިސީޒަނުގައި ސަލާހް ވަނީ ޕްރިމިއަރ ލީގުގައި މިހާތަނަށް 17 ލަނޑު ޖަހައި، 13 ލަނޑު ޖަހަން މަގުފަހި ކޮށްދީފައެވެ.
މިމޮޅާއެކު ތާވަލުގެ ކުރީގައި ލިވަޕޫލް އޮތީ 18 މެޗުން ހޯދި 45 ޕޮއިންޓާއެކުއެވެ. ދެވަނައިގައި ނޮޓިންހަމް ފޮރެސްޓް އޮތީ 37 ޕޮއިންޓާއެކުއެވެ.
