ދެކުނު އެފްރިކާގައި ޗައިނާގެ ކުންފުންޏަކުން މެންހަޓަން އޮފް އެފްރިކާ ބިނާ ކުރުމަށް 5 ބިލިއަން ޑޮލަރަށް ބިމެއް ގަނެގެން މެގަ ސިޓީއެއް ބިނާ ކުރުމަށް ޕްރޮޖެކްޓެއް ހިންގަން އުޅުނެވެ. މި ޕްރޮޖެކްޓް ފަރުމާކޮށްފައިވަނީ ޝަންހާއީގެ ޒެންޑައި ގްރޫޕުން ނެވެ. އެ ގްރޫޕުން ވަނީ 2013 ވަނަ އަހަރު 1،600 ހެކްޓަރުގެ ބިން، ޖޮހަނެސްބަރގްއިން ގަނެފަ އެވެ.
އެކުންފުނިން ތަޞައްވުރު ކުރީ ފުރިހަމައަށް ގުޅިފައިވާ ސްމާޓް އަދި ޒަމާނީ ސިޓީއެއް ބިނާކުރާށެވެ. ޑިވެލޮޕަރުން ވައުދުވީ 300،000 ވަޒީފާއާއި 50،000 ގެއާއި ޝޮޕިން ސެންޓަރުތަކާއި ސްކޫލްތަކާއި ހޮސްޕިޓަލްތައް ހިމެނޭ ޒަމާނީ ވަސީލަތްތައް ލިބެން ހުންނާނެ ސިޓީއެއް ބިނާ ކުރުމަށެވެ. އަދި ލަގްޒަރީ އުސް އިމާރާތްތަކާއި ފަހި ފެހި ޖަންގަލީތަކާއި ޕާކުތަކެއް ހެދުމަށް ވައުދުވި އެވެ.
އަދި މި މުސްތަގްބަލުގެ ސިޓީން ޖޮހަންސަބާގަށް ދަތުރުކުރުމަށް އެންމެ ހަތް މިނެޓް ނަގާ ހައިސްޕީޑް ރޭލް ނެޓްވޯކަކާ ގުޅުވައިލުމުގެ ޕްލޭންތައް ވެސް އޮތް ކަމަށް ދަ ކިޔައިދިނެވެ.
ޒެންޑައިގެ ޗެއާމަން ޑައި ޒިކާންގް ވިދާޅުވީ އެއީ "މުޅި އެފްރިކާގެ މުސްތަގުބަލުގެ ވެރިރަށް" ކަމަށެވެ. އަދި "މިއީ އެމެރިކާގެ ނިއުޔޯކް ނުވަތަ ދުރު އިރުމަތީގެ ހޮންކޮންގް ފަދަ ސިޓީތަކާ އެއްވަރަށް ތަރައްގީ ވާނެ ތަނެއް" ކަމަށެވެ.
އެޓްކިންސް އާއި އަރޫޕް ފަދަ ބައިނަލްއަގްވާމީ މަތީ ފެންވަރުގެ ކޮންސަލްޓިން ކުންފުނިތަކުން 1،600 ހެކްޓަރުގެ މި ސަރަހައްދުގެ މާސްޓަޕްލޭން އެކުލަވާލުމަށް ކޮންޓްރެކްޓަށް ނެގި އެވެ.
ޖޮހަނަސްބަރގްގެ ސިޓީ ސަރުކާރުން އެދުނީ ޑިވެލޮޕަރުންނަށް ސިޓީކައިރީގައި ތިބުމަށާއި އަދި ހިސާބުގަނޑުގެ މީހުންނަށް އަގުހެޔޮ އެތައް ހާސް ހައުސިން ޔުނިޓްތަކެއް ވެސް މި ޕްރޮޖެކްޓްގައި ހިމެނުމަށެވެ. ނަމަވެސް ކުންފުނީގެ ޕްލޭންގައި ހިމެނުނީ ހަމައެކަނި އެންމެ މަތީފެންވަރުގެ މުއްސަނދި މީހުންނަށް ލަގްޒަރީ ގެތައް އަޅާށެވެ.
އެ މަޝްރޫއު ލސްވަމުން ގޮސް ދެ އަހަރު ވަންދެން ހުއްޓިފައި އޮތުމަށްފަހު އެންމެ ފަހުން ކުންފުނިން އިއުލާން ކުރީ މިހާރު ޕްރޮޖެކްޓް އެއްކޮށް ވަޅު ޖެހިފައިވާ ކަމަށެވެ.
މިއީ ޗައިނާއިން މިގޮތަށް ފަރުމާ ކުރި ނުވަތަ ފަރުމާ ކުރަން އުޅުނު ފުރަތަމަ ސިޓީއެއް ނޫނެވެ!
ޗައިނާއިން ބިލިއަން ޑޮލަރުގެ ސިޓީއެއް މެލޭޝިއާގައި ބިނާކުރިއެވެ. ފޮރެސްޓް ސިޓީ ފެންނަނީ ފަޚުރުވެރި ރިސޯޓެއް ގޮތަށެވެ. ސިންގަޕޫރާ މާދުރު ނޫން ހިސާބެއްގައި ބިނާކުރި މިސިޓީ އަދިވެސް އޮތީ ފަޅަށެވެ. އެތައް ސަތޭކަ އުސް އިމާރާތްތަކާއި، ވިލާތަކާއި، ތާރު އަޅާފައިވާ މަގުތައް ފޮރެސްޓް ސިޓީން ފެނެއެވެ. އެކަމަކު މީހުންނެއް ނުފެނެއެވެ. ފާޑުކިޔާ މީހުން ބުނަނީ ބިރުވެރި "ޖިންނި ސިޓީ" އެއް ކަމެވެ.
މި ތަންތަނަކީ، ޗައިނާގެ ބެލްޓް އެންޑް ރޯޑް ޕްރޮޖެކްޓްގެ ދަށުން ފައިސާ އަޅައި އިންވެސްޓް ކުރާ ތަންތަނެވެ. މިތަންތަނަށް ދައްކާނެ ފައިސާ ނެތި މީހުން ދަރަނީގެ ދަންތުރައިގައި ޖެހެއެވެ. މެލޭޝިއާގެ މި ބިޔަ މަޝްރޫއު ބިނާކުރަމުން އައީ 2016 ވަނަ އަހަރު ޗައިނާގައި ރިއަލް އެސްޓޭޓް ބޫމް އައި ދުވަސްވަރު އެވެ.
ފޮރެސްޓް ސިޓީގެ އުސް އިމާރާތްތަކުގައި ދިރިއުޅެނީ ޗައިނާގެ މަދު ސަތޭކަ އެއްހައި މީހުންނެވެ. މި މަޝްރޫޢުގެ މަސައްކަތުގެ ނިމިފައިވަނީ އެންމެ 15 އިންސައްތައެވެ.
އެފަދަ އެހެން ޖިންނި ސިޓީއެކެވެ! މިފަހަރު ޗައިނާގައެވެ! ޓިއަންޑޫޗެންގްގައި ޕެރިހުގެ މޮޑެލެއް ބިނާ ކުރިއެވެ. ހިނގާބިނގާވެ އުޅޭ މަގުތަކާއި ކެފޭތަކާއި ޕާކްތަކާއި ސައިނޭޖްތައް ވެސް ހަރުކޮށްފައި ޕެރިސްގޮތަށް ދައްކާފައިވާ ސިޓީއެކެވެ. އެތައް އަހަރަކަށް ފަހު އާބާދުވީ އެންމެ 2،000 މީހުން ނެވެ.
މިސިޓީ ލަގްޒަރީ ރިއަލް އެސްޓޭޓް ޑިވެލޮޕްމަންޓަށް ހުޅުވީ 2007 ވަނަ އަހަރު 2 ބިލިއަން ޑޮލަރުގެ ބޮޑު ކޮންސްޓްރަކްޝަން މަޝްރޫއަކާ އެކުގައެވެ. އެ ސިޓީގައި ބިނާ ކުރި އޭފަލް ޓަވަރަކީ ފްރާންސްގެ އަސްލު ޓަވަރަށް ވުރެ 729 ފޫޓު ކުރު ޓަވަރެކެވެ. އުސްމިނުގައި ހުރީ އެންމެ 107 މީޓަރެވެ.
އޭރު ފްރާންސްގެ ރިއާސީ ގަނޑުވަރު ހުންނަ މަގު، ޝޮންޒެލީޒޭ އެވޭނުގެ ކޮޕީއެއް، ޝިއަންގްޒީ ރޯޑްގެ ނަމުން ބިނާ ކުރިއެވެ. ފަހުން އެނަން ފްރާންސް އެވެނިއުއަށް ބަދަލު ކުރިއެވެ.
ޑިވެލޮޕަރުން ވަނީ ޓިއަންޑޫޗެންގް އަށް ޚާއްސަ ގަސްގަހާގެއްސާއި ޕްލާންޓިން އާއި ފެންއަރުވާޑާންތަކާއެކު އަމިއްލަ ޕެލަސް އޮފް ވަރސޭގެ ބަގީޗާތައް ވެސް ހަދައި ދީފަ އެވެ.
އަދި ޕެރިހުގެ ސްޓައިލަށް ހިޔާއެޅޭ މަގުތަކެއް ހުރުމުން، ފްރާންސްގެ ވެރިރަށުގެ ސާފު ކޮޕީއެއް ހެން ހީވެއެވެ.
އެކަމަކު މި ހުރިހާ ކަމެއް ކުރި ނަމަވެސް ލޯބިވެރިންގެ ސިޓީ ޕެރިސްގެ މި ކޮޕީ ސިޓީއަށް ހިތްޖެހުނު ބަޔަކު ނެތެވެ. ސަބަބަކީ، ޒިޖިއަންގް ޕްރޮވިންސްގެ ރަށްރަށުން މިސިޓީއަށް ވާސިލްވާން މީހުންނަށް އުނދަގޫ ވުމެވެ.
2007 އާއި 2013 އާ ދެމެދު މަސައްކަތް ކޮށްގެން، 10،000 މީހުންނަށް ބިނާކޮށްފައިވާ ސިޓީގައި ދިރިއުޅެމުން ދިޔައީ އެންމެ 2،000 އެއްހާ މީހުންނެވެ.
