ބޭރު ފައިސާއާ ބެހޭ ގާނޫނަށް މިއަދުން ފެށިގެން އަމަލު ކުރަން ފެށުނީއެވެ. ބޭރު ފައިސާއާ ބެހޭ ޤާނޫނަކީ، ޤާނޫނު ނަންނަބަރު 2024/32 "ބޭރު ފައިސާއާ ބެހޭ ޤާނޫނު" އެވެ.
26 މާއްދާގެ މައްޗަށް އެކުލެވިގެންވާ ޤާނޫނަކީ، ބޭރު ފައިސާއިން ކުރެވޭނެ މުއާމަލާތްތައް ކަނޑައެޅުމާއި، ބޭރު ފައިސާއިން ލިބޭ އާމްދަނީ ބޭންކުތަކަށް ޖަމާކުރުމާއި މާރުކުރުމާ ބެހޭ އުސޫލު ކަނޑައަޅާ ޤާނޫނެވެ.
މި ޤާނޫނުގެ މަގްސަދުތައް ކަމަށް 2 ވަނަ މާއްދާގައި ބުނެފައި ވަނީ، ރާއްޖެއަށް ބޭރު ފައިސާ ލިބޭ ގޮތް މަގުފަހި ކުރުމާއި، ބޭރު ފައިސާއިން ކުރެވޭ މުއާމަލާތްތައް ކަނޑައެޅުމާއި، ވިޔަފާރިތަކަށް ލިބޭ ބޭރު ފައިސާ ބޭންކު އެކައުންޓަށް ޖަމާ ކުރުމާ ބެހޭ އުސޫލު ކަނޑައެޅުމާއި ބޭރު ފައިސާއިން ލިބޭ އާމްދަނީގެ ބައެއް، ރުފިޔާއިން މާރު ކުރުމާ ބެހޭ އުސޫލު ކަނޑައެޅުމެވެ.
މިޤާނޫނުގައި ބަޔާންކޮށްފައިވާ ކަންކަން ފިޔަވައި، ދިވެއްސަކު ގަންނަ މުދަލާއި ޚިދުމަތުގެ އަގު ބޭރު ފައިސާއިން އަދާކުރުމަށް ލާޒިމެއް ނުކުރެވޭނެ ކަމަށްވެސް ޤާނޫނުގައި ބަޔާންކޮށްފައި ވެއެވެ.
ބޭރު ފައިސާގެ އާމްދަނީ ބޭންކު އެކައުންޓަށް ޖަމާ ކުރަން ޖެހޭ ފަރާތްތައް ކަމަށް ޤާނޫނުގެ 7 ވަނަ މާއްދާގައި ބަޔާން ކޮށްފައި ވަނީ، ޓޫރިޒަމް ދާއިރާގެ މުދާ ވިއްކާ ފަރާތްތަކާއި، ޚިދުމަތް ދޭ ވިޔަފާރިތަކާއި، މަދުވެގެން 15 މިލިއަން އެމެރިކާ ޑޮލަރަށް ވާވަރަށް ބޭރު ފައިސާއިން އާމްދަނީ ލިބޭ ފަރާތްތަކެވެ.
މިފަރާތްތަކަށް މީލާދީ މަހެއްގެ ތެރޭގައި ލިބޭ ބޭރު ފައިސާ ބޭންކު އެކައުންޓަށް ޖަމާކުރަން ޖެހޭނެކަމަށް 7 ވަނަ މާއްދާގައި ބަޔާންކޮށްފައި ވެއެވެ.
ބޭރުފައިސާއިން ލިބޭ އާމްދަނީން ބައެއް ރުފިޔާއިން މާރުކުރަން ޖެހޭ ފަރާތްތައް ބަޔާންކޮށްފައި ވަނީ 9 ވަނަ މާއްދާގައެވެ.
އެ މާއްދާގައި "ކެޓަގަރީ އޭ" އާއި "ކެޓަގަރީ ބީ" ގެ ނަމުން ދެ ބައެއް ގިންތިކޮށްފައި ވެއެވެ.
"ކެޓެގަރީ އޭ"ގައި ގިންތިކޮށްފައި ވަނީ، ފަތުރުވެރިކަމުގެ ވިޔަފާރިތައް ކަމަށްވާ ރިސޯޓްތަކެވެ.
އެތަންތަނުން، ބޭރު ފައިސާ މާރުކުރުމަށް 2 އިޚުތިޔާރެއް ދީފައި ވެއެވެ. އެގޮތުން، ބޭނުން ނަމަ، ކޮންމެ ފަތުރުވެރިއެއްގެ ބޮލަކަށް 500 ޑޮލަރު މާރުކުރެވިދާނެއެވެ. ނުވަތަ ކޮންމެ މަސްދުވަހަކަށް ބޭރު ފައިސާއިން ކޮށްފައިވާ ވިޔަފާރީގެ 20 އިންސައްތަ ބޭރު ފައިސާ މާރު ކުރެވިދާނެއެވެ.
"ކެޓަގަރީ ބީ" ގައި ގިންތިކޮށްފައިވަނީ ގެސްޓް ހައުސްތަކާއި ޓޫރިސްޓު އުޅަނދުތަކާއި ހޮޓާތަކެވެ.
އެތަންނަށްވެސް ދެ އިޚުތިޔާރެއް ދީފައި ވެއެވެ.
ފުރަތަމަ އިޚުތިޔާރަކީ، ކޮންމެ މީލާދީ މަހެއްގެ ތެރޭގައި އެތަނަކަށް އަންނަ ކޮންމެ ބޮލަކަށް 25 ޑޮލަރުގެ ރޭޓުން މާރުކުރުން ނޫނީ، ބޭރު ފައިސާއިން ކޮށްފައިވާ ވިޔަފާރީގެ 20 އިންސައްތަ ބެންކު މެދުވެރިކޮށް މާރުކުރުމެވެ.
މި ފައިސާތައް މާރުކޮށް ނިންމުމަށްވެސް ޤާނޫނުގައި މުއްދަތެއް ދީފައި ވެއެވެ.
އެމުއްދަތަކީ، އެ ފައިސާ މާރު ކުރަން ޖެހޭ ކޮންމެ މީލާދީ މަހެއް ނިމިގެން ހިނގާ 3 ވަނަ މަހުގެ 28ގެ ކުރިން އެފައިސާ މާރުކޮށް ނިންމަން ވާނެއެވެ.
މި ދެ ކެޓަގަރީއަށް އަންނަ ފަތުރުވެރިން ހިސާބު ކުރުމުގައި އިސްތިސްނާ ހާލަތްތަކެއްވެސް މިގާނޫނުގެ 11 ވަނަ މާއްދާގައި ދީފައި ވެއެވެ. ބޭރު ފައިސާ މާރުކުރުމަށް ބޯ ގުނާ އިރު އިސްތިސްނާ ކުރެވޭ ފަރާތްތަކަކީ، އެ ތަނެއްގައި 24 ގަޑިއިރު ހޭދަކޮށްފައި ނުވާ ފަރާތްތަކާއި، 12 އަހަރު ނުފުރޭ ކުދިންނާއި، އެތަނެއްގައި ހިލޭ ތިބޭ ފަރާތްތަކާއި، ސަރުކާރުން މެހުމާންދާރީ އަދާ ކުރާ ފަރާތްތަކެވެ.
މި ޤާނޫނާ ޚިލާފްވާ ފަރާތްތަކުގެ މައްސަލަތައް ބެލުމުގެ އިޚުތިޔާރު ދީފައި ވަނީ އެމްއެމްއޭ އަށެވެ.
މިއަދުން ފެށިގެން މި ޤާނޫނަށް ޢަމަލު ކުރަން ފަށާފައި ވުމާއެކު 10 ދުވަސް ތެރޭގައި ޓޫރިޒަމް ދާއިރާގެ މުދާ ވިއްކާ ފަރާތްތަކާއި ޚިދުމަތް ދޭ ފަރާތްތައް ރަޖިސްޓްރީ ކުރުމަށް ހުށަހަޅަން ޤާނޫނުން ލާޒިމުކޮށްފައި ވެއެވެ.
މި ޤާނޫނުގައި ފާހަގަ ކުރެވުނު ނުކުތާއަކީ، ޤާނޫނުގެ 26 ވަނަ މާއްދާގެ (ލ)ގައި "ބޭރު ފައިސާއިން އާމްދަނީ ލިބޭ ވިޔަފާރިއެއް" ކަމަށް މާނަ ކުރުމުގައި ބަޔާންކޮށްފައިވާ، ފަދަ ވިޔަފާރިއެއްގެ ވާހަކަ ޤާނޫނުގެ ނައްސުގައި ބަޔާންކޮށްފައި ނެތް ކަމެވެ.
