އެމެރިކާގެ އެލަސްކާގެ ވިޓިއާ އަވަށުގައި އެންމެން ދިރިއުޅެނީ އެއް އިމާރާތެއްގަ އެވެ. 14 ބުރީގެ މި އިމާރާތަކީ 'ބެގިޗް ޓަވަރސް ކޮންޑޮމިނިއަމް' ގެ ނަމުން މަޝްހޫރު އިމާރާތެވެ.
އާބާދީގައި 263 މީހުން ހިމެނޭ މިއަވަށުގެ އެންމެނަށް ބޭނުންވާ ޚިދުމަތްތަކާއި ޚިދުމަތް ދޭ އިދާރާތައް ވެސް ހުންނަނީ މި ކޮންޑޯގައެވެ.
މިއީ ދުނިޔޭގައި އެއް ފުރާޅެއްގެ ދަށުގައި އޮތް ހަމައެކަނި އަވަށެވެ.
މި އިމާރާތުގައި ސްކޫލުން ފެށިގެން ޕޮލިސް ސްޓޭޝަނުން، ހޮސްޕިޓަލާއި ހަމައަށް ހުރިހާ ޚިދުމަތެއް ވެސް ދެނީ މި އިމާރާތުގައެވެ. ފައްޅިއާއި ފިހާރަތައްވެސް ހުންނަނީ މިތާގައެވެ. އިމާރާތުގެ ފުރަތަމަ ފަންގިފިލާއިން ހުރިހައި އާންމު ޚިދުމަތެއް ލިބެން ހުރެއެވެ.
މި ތަފާތު އިމާރާތަކީ 1956 ވަނަ އަހަރު ބިނާކޮށްފައިވާ އިމާރާތެކެވެ.
ދެވަނަ ބޮޑު ހަނގުރާމައިގެ ދުވަސްވަރު މިތާނގައި ސިފައިންގެ ކޮށްޓެއް އޮތެވެ. އެކަމަކު އަހަރުތަކެއް ފަހުން ހިސާބުގެ މީހުން އެ ކޮށީގައި ދިރިއުޅެން ފެށުމުން މުޅި ކޮށި އެޕާޓްމަންޓް ބިލްޑިންއަކަށް ބަދަލުކުރީ އެވެ.
މި ސަރަޙައްދަކީ، މެދުނުކެނޑި ސްނޯ ވެހޭ ސަރަހައްދެއްކަމުން، މީހުން އިމާރާތުން ބޭރަށް ނިކުމެ ނޫޅެއެވެ. އެކަމަކު އާބާދީވެސް އިތުރުވާ ހެނެއް ހިއެއް ނުވެއެވެ!
މި އަވަށުގެ ގިނަ މީހުން މަސައްކަތް ކުރަނީ މި ބިލްޑިންގާ ގާތްގަނޑަކަށް 100 މީޓަރު ދުރުގައި އޮންނަ ބަނދަރުގައެވެ. ޖިމެއްގެ އިތުރުން މި އިމާރާތުގައި ކެފޭތަކެއްވެސް ހުރެއެވެ.
