ސަރުކާރުގެ މެޖޯރިޓީ ހިއްސާ އޮންނަ ކުންފުނިތަކަށް މީގެ ފަހުން ލޯނު ނެގޭނީ ފިނޭންސް މިނިސްޓްރީގެ ހުއްދަޔާއެކު ކަމަށް ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ)އިން ނިންމައިފިއެވެ.
ޕީސީބީއިން އިއްޔެ ކުންފުނިތަކަށް ފޮނުވި ސާކިއުލާއެއްގައި ބުނީ ސަރުކާރު ހިއްސާވާ ކުންފުނިތަކުގެ ހިންގާ ގަވާއިދެއް މި މަހުގެ 25 ވަަނަ ދުވަހު ޕީސީބީއިން ބޭއްވި ބޯޑު ބައްދަލުވުމުގައި ފާސްކޮށްފައިވާ ކަމަށެވެ.
މިބަދަލުގެ ސަބަބުން ކުންފުނިތަކުން ބަޖެޓު އެކުލަވާލާއިރު، އެ އަހަރެއްގެ ތެރޭގައި ކުންފުންޏަށް ބޭނުންވާ ހަރު މުދަލާއި ހިންގުމަށާއި ނުވަތަ ވިޔަފާރި ފުޅާކުރަން ލޯނެއް ބޭނުންވާ ނަމަ، އެކަމުގެ އެސެސްމަންޓަކާ އެކު ބަޖެޓުގައި ހިމަނަންޖެހޭނެ އެވެ. އަދި މުސާރައިގެ އޮނިގަނޑަށް ގެންނަން ބޭނުންވާ ބަދަލުތައްވެސް ބަޖެޓްކޮށް ފިނޭންސް މިނިސްޓްރީއަށް ހުށަހަޅައި ހުއްދަ ހޯދަން ޖެހެއެވެ.
ސަރުކާރު ކުންފުންޏަކުން ލޯނު ނަގާނަމަ، ލޯނު ބޭނުންވާ ސަބަބު ދެނެގަނެ ފައިނޭންސް ކުރަން ހުރި އޮޕްޝަންތަކުގެ އެސެސްމަންޓެއް ހަދައި، ލޯނު ދޫކުރާ އެއް ފަރާތަށްވުރެ ގިނަ ފަރާތްތައް ދިރާސާކޮށް އެކުލަވާލައި ޓެކްނިކަލް ކަރުދާހެއް ކުންފުނީގެ ބޯޑުން މެނޭޖްމަންޓަށް ހުށަހަޅަންޖެހޭނެ އެވެ. އެ ކަރުދާހުގައި ލޯނު ބޭނުންވާ ސަބަބާއި ކުންފުނީގެ މާލީ ހާލަތާއި ޝަރުތުތަކާއި ލޯނު އަނބުރާ ދެއްކުމުގެ ގާބިލްކަން ހުރި މިންވަރު ހިމަނަންޖެހެ އެވެ. އަދި އަނބުރާ ލޯނު ދެއްކުމަށް އެއްވެސް ދައްޗެއް ނުވަތަ ގޮންޖެހުމެއް ކުރިމަތިވާނެކަން ނުވަތަ ނޫންކަން ހާމަކުރަން މި ގަވައިދުގައި ވަނީ ލާޒިމު ކޮށްފައެވެ.
ލޯނު ހޯދުމަށް އެދި ފިނޭންސް މިނިސްޓްރީއަށް ހުށަހެޅުމުގެ ކުރިން ލޯނާ ގުޅޭ އެ ކަރުދާސް އެކުންފުންޏެއްގެ ބޯޑަށް ހުށަހަޅައި ފާސްކުރަން ޖެހޭނެކަމަށްވެސް މި ގަވައިދުގައި ބުނެއެވެ.
ޕީސީބީއިން މިބަދަލު ގެނެސްފައި މިވަނީ، ސަރުކާރު ހިއްސާވާ ބައެއް ކުންފުނިތަކުގެ ދަރަނިތައް އިންތިހާއަށް ބޮޑުވެ، ކުންފުނިތަކުގެ ހިންގުން ހަރުދަނާ ކުރުމަށް ގިނަ ފިޔަވަޅުތަކެއް ސަރުކާރުން އަޅުއްވަމުން ގެންދަވާ ދަނޑިވަޅެއްގައެވެ.
