މިއަދު އަމަލު ކުރަން ފެށި، ރާއްޖެ-ޗައިނާ މިނިވަން ވިޔަފާރީގެ އެއްބަސްވުމުގެ ސަބަބުން ދިވެހި މަސްވެރިކަމުގެ ސިނާއަތަށް ބޮޑެތި ފައިދާތަކެއް ކުރާނެ ކަމަށް މަސްވެރިކަމާ ބެހޭ ވުޒާރާއިން ހާމަކުރައްވައިފިއެވެ.
މަސްވެރިކަމާ ބެހޭ ވުޒާރާއިން މިއަދު ހަވީރު ނެރެފައިވާ ނޫސްބަޔާނެއްގައި ބުނީ ރާއްޖެ-ޗައިނާ މިނިވަން ވިޔަފާރީގެ އެއްބަސްވުމަށް މަރުހަބާ ކިޔާ ކަމަށެވެ.
"މި އެއްބަސްވުމުގެ ސަބަބުން މަސްވެރިކަމުގެ ސިނާއަތަށް އިތުރު ފުރުސަތުތައް ހުޅުވި ދިވެހިރާއްޖޭގެ މަހުގެ އުފެއްދުންތަކުގެ ވިޔަފާރި ކުރިއަރައިގެންދާނެއެވެ. މިނިވަން ވިޔަފާރި އެއްބަސްވުމުގެ މައިގަނޑު މަގްސަދަކީ އެކްސްޕޯޓް އިތުރު ކުރުމާއި، ވިޔަފާރީގެ ހުރަސްތައް މަދުކުރުމާއި، އަދި ދިވެހިރާއްޖެ އާއި ޗައިނާގެ ވިޔަފާރިތަކަށް އައު ފުރުސަތުތަކެއް އުފައްދައި ފަހިކޮށްދިނުމެވެ" މަސްވެރިކަމާ ބެހޭ ވުޒާރާއިން ނެރެފައިވާ ނޫސްބަޔާނުގައި ބުނެފައިވެއެވެ.
މިނިވަން ވިޔަފާރީގެ އެއްބަސްވުމުގެ ސަބަބުން މަހުގެ ހުރިހާ ބާވަތްތަކެއްހެން ރާއްޖެއިން ޗައިނާއަށް ސުން ޓެކުހުގައި އެކްސްޕޯޓް ކުރެވޭނެއެވެ. އަދި މަހުގެ ބާވަތްތައް ރީ-އެކްސްޕޯޓް ކުރުމަށްވެސް މަގުފަހިވެގެންދާނެއެވެ. ހާއްސަ ގޮތެއްގައި ސީފުޑުގެ ބާވަތްތައް ރާއްޖެއިން ޗައިނާއަށް އެކްސްޕޯޓު ކުރުމަށް ލިބިގެންދާނެ މިއީ ވަރަށް ފަހި ފުރުސަތެއްގެ ގޮތުގައި މަސްވެރިކަމާ ބެހޭ ވުޒާރާއިން ފާހަގަ ކުރައްވައެވެ.
