އައު އަހަރުގެ ފުރަތަމަ ދުވަހު، ޒަޔަނިސްޓް އިޒްރޭލުން ފަަލަސްތީނުން 22 މީހުން ޝަހީދު ކޮށްލައިފިއެވެ.
އަލްޖަޒީރާއިން ރިޕޯޓުކޮށްފައިވާ ގޮތުގައި 22 މީހުން ޝަހީދުކޮށްލާފައި ވަނީ، ޚާންޔޫނިސްގެ ދެކުނަށާއި ޖަބަލިޔާގެ އުތުރާއި ބުރީޒް ރެފިއުޖީ ކޭމްޕުގެ މެދުތެރެއަށް ޒަޔަނިސްޓުން ދިން ހަމަލާތަކުގައެވެ. މީގެ ތެރެއިން 18 މީހުންނަކީ އަންހެނުންނާއި ކުޑަކުދިން ކަމަށް އަލްޖަޒީރާއިން ބުނެއެވެ.
ޣައްޒާ ސިޓީގައި ބޯ ވާރޭގެ ސަބަބުން ފެންބޮޑުވެ، ފިނިމޫސުމުގެ ސަބަބުން އެތައްބަޔަކު ވަނީ ރެފިއުޖީ ކޭމްޕްތައް ދޫކޮށް އެހެނިހެން ގޮތްގޮތުން ބޯހިޔާވަހިކަން ހޯދަން މަޖުބޫރުވެފައެވެ. އަދި ގަދަ ފިނީގެ ސަބަބުން ތުއްތު ތުއްތު އެތައް ކުދިންނެއް ދަނީ ކޮންމެ ދުވަހަކު ޝަހީދުވަމުންނެވެ.
ފަލަސްތީނުގެ ނަސްލު ނައްތާލުމަށް ޒަޔަނިސްޓް އިޒްރޭލުން ހިންގަމުންދާ ޢުދުވާނުގައި ޣައްޒާ ސިޓީގެ ސިއްހީ ނިޒާމު އެއްކޮށް ވަނީ ފުޑުފުޑުކޮށްލާފައެވެ. އަދި ފެނާއި ކާބޯތަކެތި ޣައްޒާގެ ރައްޔިތުންނަށް ލިބެންހުރި ދޮރުތައްވެސް ޒަޔަނިސްޓް އިޒްރޭލުން ގެންދަނީ ބަންދުކުރަމުންނެވެ.
