ރަނަކީ އިންޑިއާގެ ސަގާފަތުގައި މީހުން ބައްކުރާ އެންމެ މުހިންމު މުދަލެވެ. އިންޑިއާގެ އަންހެނުންގެ އަތުގައި ހުރި ރަނުގެ އަގު ދުނިޔޭގެ ބައެއް ގައުމުތަކުގެ މުޅި ރަނުގެ މުއްސަނދިކަމަށް ވުރެން އިތުރު ކަމަށް ވޯލްޑް ގޯލްޑް ކައުންސިލުން ބުނެއެވެ.
އިންޑިއާގެ އަންހެނުންގެ އަތުގައި ހުރި ރަން 24،000 ޓަނަށް ވުރެން އިތުރު ވާނެ ކަމަށް ވޯލްޑް ގޯލްޑް ކައުންސިލުން ލަފާ ކުރެއެވެ. އޭގެ އިތުރުން، ފައްޅިތަކުގައިވެސް ފޮރުވާފައިވާ އެތައް ޓަނެއްގެ ރަން މީގެ ތެރޭގައި ނުހިމެނެއެވެ.
ގޯލްޑް ކައުންސިލްގެ ރިޕޯޓު ބުނާ ގޮތުން، ދުނިޔޭގެ ޖުމްލަ ރަނުގެ 11 ޕަސެންޓް ރައްކާކޮށްފައި ވަނީ އިންޑިއާގެ އަންހެނުންގެ އަތުގައެވެ. އަދި މި ރަނަކީ، ދުނިޔޭގެ އެންމެ ގިނައިން ރައް ރައްކާކޮށްފައިވާ 5 ގައުމުގެ ރަނަށް ވުރެން އިތުރު އަދަދެއް ކަމަށްވެސް ވެއެވެ.
އެންމެ ގިނައަދަދަކަށް ރަން ފޮރުވާފައިވާ 5 ގައުމަކީ، އެމެރިކާ (8ހާސް ޓަން) ޖަރުމަން (3،300ޓަން) އިޓަލީ (2450 ތަން) ފްރާންސް (2400 ޓަން) އަދި ރަޝިޔާ (1900 ޓަން) އެވެ.
އިންޑިއާގައި މީހަކާ އިނދެގެން އުޅޭ އަންހެނަކަށް ޓެކްސް ދެއްކުމަކާ ނުލައި 500 ގްރާމް ރަން ގެންގުޅެވެއެވެ. އަދި މީހަކާ ނީނދެ ހުރި މީހަކަށް 250 ގްރާމް އަދި ފިރިހެނަކަށް 100 ގްރާމް ޓެކްސް ނުދައްކައި އަތުގައި ބެހެއްޓޭނެއެވެ.
