ޗައިނާގެ ހަސްފަތާލުތައް ތޮތްޖެހިފައިވާ ތަން ފެންނަ ވީޑިއޯއާއި ފޮޓޯތަކާއެކު ކޯވިޑްގެ ބިރުވެރި މަންޒަރު ހިތަށް ގެނެވެއެވެ. ސިއްރު ވައިރަހެއް ހަލުއި ކަމާއެކު ފެތުރެނީ ހެއްޔެވެ؟
މިއީ އެންމެންގެ ސުއާލެވެ.
ޗައިނާއިން އެއްވެސް ކަމެއް ޔަގީން ކޮށެއް ނުދެއެވެ.
ދުނިޔޭގެ ސިއްޙަތު ޖަމުއިއްޔާއިން އާދަޔާ ޚިލާފު ކަމެއް އުޅޭ ކަމަކަށް ޔަގީން ކޮށެއް ވެސް ނުދެއެވެ.
ކޮވިޑާއެކު ދުނިޔެއަށް އާންމުވި މާސްކު އެޅުން އަނެއްކާވެސް ވަނީ ޗައިނާގެ ބައެއް ހިސާބުތަކުގައި އާންމު ވެފައެވެ.
ޔަގީން ނުކުރެވޭ އަދި ކަންބޮޑުވާ ވީޑިއޯތައް ސޯޝަލް މީޑިއާގައި އާ އަހަރުގެ އީދާއެކު އާންމު ވަމުން ދެއެވެ.
ބައެއް މީހުން ބުނާ ގޮތުގައި ޗައިނާގެ ދެކުނުގެ ހުނާން ޕްރޮވިންސްގެ ވަށައިގެންވާ ސަރަހައްދުތަކުގައި ހޮސްޕިޓަލްތަކަށް ބާރު ބޮޑު ވެފައި ވެއެވެ.
ޗައިނާގެ ލޯކަލް މީޑިއާ ބުނާ ގޮތުގައި ދިމާވެގެން އުޅެނީ އަރިދަފުސް ރޯގާއެއްގެ ވައްތަރެކެވެ. އަދި އެއީ ކުރިން މީހުން ދުވަހަކުވެސް އަޑު އަހާފައި ނުވާ ނުރައްކާތެރި ވައިރަސްއެއް ކަމަށްވާ ހިއުމަން މެޓަޕްނިއުމޯވައިރަސް (އެޗްއެމްޕީވީ) ގެ ސަބަބުން ދިމާވާ އަރިދަފުހެއް ކަމަށް ބުނެއެވެ.
އާންމުކޮށް މިއީ އަރިދަފުސް ޖެހި ނޭވާލުމަށް ދަތިވާ ހާލަތަށް މީހާ ވައްޓާލާފަދަ ބައްޔެކެވެ. ބައެއް ހާލަތްތަކުގައި ހަސްފަތާލުގައި އެޑްމިޓްކޮށް އަދި ގޯސްވާ ހާލަތުގައި މީހާ މަރުވެ ދެއެވެ.
ޗައިނާގެ ބައެއް ހިސާބުތަކުގައި ހަސްފަތާލުތަކުގެ ވެއިޓްލިސްޓު ވަނީ އިތުރު ވެފައެވެ. ކިއު ބޮޑު ވެފައެވެ.
އެކަމަކު ޗައިނާގެ ސެންޓަރ ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ) ގެ ރަސްމީ ރިޕޯޓްތަކުން ދައްކާ ގޮތުގައި މިހާރު މިއުޅެނީ އާދަވެގެން ލައިގަންނަ މޫސުމީ ރޯގާއެކެވެ. އަދި ހަދާ ޓެސްޓްތަކުގެ 30 ޕަސެންޓް ޓެސްޓުތައް އަނބުރާ އަންނަނީ އަރިދަފުސް ރޯގާގެ އިންފްލުއެންޒާއަށް ޕޮޒިޓިވް ކޮށެވެ.
ހޮސްޕިޓަލުގައި އެޑްމިޓް ކުރަމުންދާ ކޮންމެ ހަތް މީހެއްގެ ތެރެއިން އެކަކު އިންފުލުއެންޒާއަށް ޕޮޒިޓިވްވާ ކަމަށް ސީޑީސީން ބުނެއެވެ.
އެމެރިކާގެ ނިއުސް އައުޓްލެޓް އަބޮލޫއޮވަންގް ނިއުސް އިން ބުނާ ގޮތުގައި ހުނާން ޕްރޮވިންސްގެ ދަނޑުވެރިއަކާ އެމީހުން ވާހަކަ ދެއްކުމުން އޭނާ ބުނެފައި ވަނީ ގޮތް ނޭނގޭ ބައްޔެއް ފެތުރެނީ ކަމަށެވެ.
އޭނާ އެ ނިއުސް ސައިޓަށް ކިޔައިދިން ގޮތުގައި ގިނަ ބަޔަކަށް ހުން އައިސްފައިވާ ކަމަށާއި، އޭގެ ތެރެއިން ގިނަ މީހުންނަށް [ބަލި] ޖެހިފައިވާ ކަމަށެވެ.
"މި ހަފްތާގައި މި ސަރަހައްދުން ގާތްގަނޑަކަށް ހަތެއް ނުވަތަ އަށް މީހަކު މަރުވި. ބައެއް މީހުން ތިބީ 50، 60، 70، 80 އަދި 40 ގެ އަހަރުތަކުގައި."
އަދި ޔަޤީން ނުކުރެވޭ ރިޕޯޓްތަކުން ވެސް ބުނަމުންދަނީ ޗައިނާގައި މީހުން އަންދާ މަރުކަޒުތަކުގައި ޖަނާޒާއަށް އެދޭ މިންވަރު އިތުރު ވަމުންދާ ކަމަށެވެ.
މި މަންޒަރުތަކުން ހަނދާންކޮށްދެނީ މީގެ ފަސް އަހަރު ކުރިން ޗައިނާގައި ފެތުރުނު ކޮވިޑް 19 އެވެ. އެއީ، ހަތް މިލިއަން މީހުންގެ ފުރާނަ ނަގާލި ބައްޔެވެ!
