އެމެރިކާއިން ސޫރިޔާގައި އަސްކަރީ މަރުކަޒެއް ހެދުމުގެ މަސައްކަތް ފަށައިފިއެވެ. މި މަރުކަޒު ހަދަނީ، ތުރުކީއާ ދެކޮޅަށް ހަނގުރާމަ ކުރާ ކުރުދީންގެ ޕީކޭކޭ ޖަމާއަތުގެ ސީރިއާގެ ގޮފި ކަމަށްވާ ވައިޕީޖީއާ ގުޅިގެންނެވެ.
އެމެރިކާ ސިފައިން ވަނީ މިދިޔަ ހަފްތާގައި، ސޫރިޔާގެ އައިނުލް ޢަރަބް އަވަށުގައި ހަދާ އަސްކަރީ މަރުކަޒަށް ބޭނުންވާ ކޮންކްރީޓް ކޮންސްޓްރަކްޝަން ބްލޮކްތައް އިރާގުން އުފުލާފައެވެ. އެތަކެތި ޖުމުލަ 13 ލޮރީގައި އުފުލި ކަމަށް ރިޕޯޓުތައް ބުނެއެވެ.
ތުރުކީން އެބަޔަކާ ދެކޮޅަށް ހަނގުރާމަ ކުރާ ކުރުދީންނާ ގުޅިގެން ތުރުކީގެ ސަރަހައްދުގައި އެމެރިކާއިން ބަނޑަހަޖަހާތީ ތުރުކީން ވަނީ ނުސީދާކޮށް ނުތަނަވަސްކަން ފާޅުކޮށްފައެވެ.
ތުރުކީ އަކީ ޣައްޒާ ހަނގުރމައިގައި އިޒްރޭލަށް ހަތިޔާރު އުފެއްދުމަށް ބޭނުންވާ ދަނގަނޑާއި ތެޔޮ ސަޕްލައި ކޮށްދިން ޤައުމެވެ. އަދި އިޒްރޭލުގެ ތާރީޚުގައި އެންމެ ގިނައިން އިޒްރޭލަށް ޒިޔާރަތް ކޮށްފައިވާ މުސްލިމު ލީޑަރަކީ ތުރުކީގެ ރައީސް ޖަރަބް އެރުދުޣާން އެވެ.
މިމަރުކަޒު ހެދުމަށްފަހު ސޫރިޔާގައި އެމެރިކާއަށް ދެ އަސްކަރީ މަރުކަޒު ގާއިމް ކުރެވުނީއެވެ. ކުރިން ހަދާފައިވާ އަސްކަރީ މަރުކަޒު ހަދާފައި ވަނީ އިރާގުން ސޫރިޔާއަށް ވަންނަ ހައިވޭގައި ސޫރިޔާގެ ސަރަހައްދުގައެވެ. މި އައު މަރުކަޒު ބިނާ ކުރަނީ ތުރުކީއާ ކައިރީގައެވެ.
