ވެނެޒުއެލާގެ ސަރުކާރު ވައްޓާލަން އުޅުނު އެމެރިކާގެ ކުލީ ސިފައިންގެ 2 މީހަކާއި، ޔޫކްރޭންގެ 3 މީހަކާއި ކޮލަމްބިއާގެ މީހަކު ހައްޔަރުކޮށްފައިވާ ކަމަށް އެގައުމުގެ ރައީސް ނިކޮލަސް މަޑޫރޯ ވިދާޅުވެއެވެ. ސްޕެއިންގެ ނޫސް އެޖެންސީ އީއެފްއީ އިން ރިޕޯޓްކޮށްފައިވާ ގޮތުގައި މިމީހުންގެ މައްޗަށް "ޓެރަރިސްޓް" އަމަލުތައް ރޭވި ކަމަށް ތުހުމަތު ކޮށްފައި ވެއެވެ.
ޔޫކްރޭންގެ ފޮރިން މިނިސްޓްރީއާ ކުލީ ސިފައިންނާ ބެހޭ ގޮތުން ސުއާލު ކުރުމުން އެކަމަށް ޖަވާބެއް ނުދެއވެ.
މަޑޫރޯ ވަނީ، ޖެނުއަރީ 10 ގައި ހުވައި ކުރެއްވުމަށް ތައްޔާރު ވަމުންނެވެ. މިއީ އޭނާގެ ދެވަނަ ދައުރެވެ. އޭނާ ވަނީ، 2024 ވަނަ އަހަރުގެ ޖުލައި މަހު ބޭއްވި އިންތިޚާބު ކާމިޔާބު ކުރައްވާފައެވެ. އެމެރިކާއިން ވަނީ އެ އިންތިޚާބަށް ތަދައްޚުލު ކޮށްފައެވެ.
ރިޔާސީ އިންތިހާބުގައި މަޑޫރޯއާ ދެކޮޅަށް ވާދަ ކުރި އިދިކޮޅު ކެންޑިޑޭޓް އެމެރިކާގެ ގޮނޑިކޮއްކޮ، އެޑްމަންޑޯ ގޮންޒާލޭޒް އުރުޓިއާ ބުނަނީ މި އިންތިޚާބު ކާމިޔާބު ކުރީ އޭނާ ކަމަށެވެ.
އެމެރިކާއާއި އެމެރިކާގެ ފަލަކުގައި އެނބުރޭ ގައުމުތަކުން ވަނީ އުރުޓިއާ އަކީ ގާނޫނީ ގޮތުން އިންތިހާބުވެފައިވާ ރައީސްގެ ގޮތުގައި ބަލައިގަނެފަ އެވެ.
