މި އަހަރު އިންޑިއާގެ ޖުމްހޫރީ ދުވަހުގެ ޕެރޭޑްގެ ޝަރަފް ވެރި މެހުމާނަކީ، އިންޑޮނޭޝިއާގެ ރައީސް ޕްރަބޯވޯ ސުބިއަންޓޯ ކަމަށް ރިޕޯޓުކޮށްފިއެވެ. އިންޑޮނޭޝިއާ ރައީސް ވަނީ ނިއުދިއްލީން އެރުވި ދައުވަތު ރަސްމީކޮށް ގަބޫލުކުރައްވާފައެވެ.
ބޮޑުވަޒީރު މޯދީގެ ތިން ވަނަ ދައުރުގެ ފުރަތަމަ މެހެމާނަކަށް ސުބިއަންޓޯ އިޚުތިޔާރު ކުރެއްވުމަކީ، އިންޑޮނޭޝިއާއާ އެކު އޮންނަ ގުޅުމާއި އިންޑިއާގެ "އެކްޓް އީސްޓް" ސިޔާސަތަށް އިންޑިއާއިން ދޭ މުހިންމުކަމުގެ އިޝާރާތެކެވެ. މި ދަތުރުފުޅުގައި ދެފަރާތުގެ ސްޓްރެޓެޖިކް އެއްބާރުލުމާއި ދިފާއީ ގުޅުން އިތުރަށް ވަރުގަދަ ކުރެވޭނެ ކަމަށް ބެލެވެއެވެ.
އިންޑިއާ އާއި އިންޑޮނޭޝިއާގެ ގުޅުމަށް ބޮޑު ކުރިއެރުމެއް ލިބުނީ 2018 ވަނަ އަހަރު ޖަކާޓާއަށް އިންޑިއާ ބޮޑު ވަޒީރު ނަރެންދްރަ މޮދީ ކުރެއްވި ދަތުރުފުޅުގައި ދެގައުމުން ކޮމްޕްރިހެންސިވް ސްޓްރެޓެޖިކް ޕާޓްނަޝިޕެއްގައި ސޮއިކޮށް، ކަނޑުދަތުރުފަތުރާއި އިންޑޯ ޕެސިފިކް އޯޝަންގެ ދާއިރާއިން ގުޅުން ބަދަހި ކުރުމުންނެވެ.
އިންޑިއާގެ އެންމެ ފުރަތަމަ ޖުމްހޫރީ ދުވަހުގެ މެހެމާނަކީވެސް އިންޑޮނޭޝިއާގެ އެއިރުގެ ރައީސް ސުކާނޯ އެވެ. އެނާއަކީ، އިންޑިއާގެ ބޮޑު ވަޒީރު ޖަވާހަރްލާލް ކެހްރޫއާއެކު ވަކި ފަރާތަކަށް ނުޖެހޭ ހަރަކާތުގެ ރަން އަހަރުތަކުގައި ދުނިޔޭގެ ދެކުނު ބިތުގެ ބޮޑެތި ލީޑަރުންނެވެ.
އިންޑިއާ އާއި އިންޑޮނޭޝިއާ އާއި ދެމެދު ދެހާސް އަހަރަށް ވުރެ ގިނަ ދުވަހުގެ ވަރުގަދަ ސަގާފީ އަދި ވިޔަފާރީގެ ގުޅުންތަކެއް ދަމަހައްޓާފައި ވެއެވެ.
އިންޑިއާއިން ފެށިގެން އިންޑޮނޭޝިއާއާ ހަމައަށް އިންޑިއާގެ ހިންދޫ، ބުޑިސްޓް އަދި މުސްލިމު ސަގާފަތްތައް ފެތުރި އާލާވެފައިވެ އެވެ.
އިންޑޮނޭޝިޔާގެ ސަގާފީ ފަންނުވެރިކަމާއި ތިއޭޓަރަކީ އިންޑއާގެ ރާމާޔަނާ އާއި މަހާބަރަތާގެ ވާހަކަތަކުގެ އަސަރު ފޯރާފައިވާ ފަންނުވެރިކަމެކެވެ.
އަދި އިންޑޮނޭޝިއާއަކީ، އާސިއާން ސަރަހައްދުގައި އިންޑިއާގެ އެންމެ ބޮޑު އެއް ވިޔަފާރީގެ ބައިވެރިޔާއެވެ.
މިދިޔަ އަހަރު ދެޤައުމުން ޖުމްލަ 26.69 ބިލިއަން އެމެރިކާ ޑޮލަރުގެ ވިޔަފާރި ކޮށްފައި ވެއެވެ.
އިންޑޮނޭޝިއާ އިން ކޯލާ ދެއްޔާއި ޕާމް އޮއިލް ދެވަނައަށް އެންމެ ގިނައިން އެތެރެކުރާ ގައުމަކީ އިންޑިއާ އެވެ. އަދި އޭގެ އިތުރުން، މައުދަނާއި ރަބަރު، އަދި ކަރުދާސްވެސް އިންޑިއާއިން އެތެރެ ކުރެއެވެ.
