ހުވަދުއަތޮޅު އުތުރުބުރީ މާމެންދޫގެ ސިއްހީ މަރުކަޒު 24 ގަޑިއިރަށް ހިދުމަތް ދެވޭނެތަނަކަށް ހަދައިދެއްވުމަށް އެރަށު ކައުންސިލުން، އީސުލްޖުމްހޫރިއްޔާ ޑޮކްޓަރ މުހުއްމަދު މުއިއްޒުގެ އަރިހު އެދެފިއެވެ.
މާމެންދޫ ކައުންސިލުން މި ކަމަށް އެދިފައިވަނީ ރައީސް ޑރ. މުއިއްޒާއެކު، އެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާ ބައްދަލުކުރައްވައި އެ ރަށަށް އެންމެ ބޭނުންވާ ކަންކަމާ ގުޅޭގޮތުން ކުރިއަށް ގެންދިޔަ މަޝްވަރާކުރެއްވުމުގައެވެ.
މި ބައްދަލުކުރެއްވުން ކުރިއަށް ދިޔައީ ރޭ ގއ. މާމެންދޫ ކައުންސިލް އިދާރާގައެވެ.
މި ބައްދަލުކުރެއްވުމުގައި ރައްޔިތުންގެ ކަންބޮޑުވުންތަކަށް އަލިއަޅުވާލައްވައި ވާހަކަފުޅު ދައްކަވަމުން ރަށުގެ ނަރުދަމާގެ މައްސަލައާއި ރަށުގެ ގިރާ ސަރަހައްދުގެ މައްސަލަތައް ވަރަށް ތަފްސީލީ ގޮތެއްގައި ކައުންސިލުން ހިއްސާކުރިއެވެ. އަދި ކައުންސިލުން ވަނީ ކައުންސިލް އިދާރާ ހިންގުމަށް އާ އިމާރާތެއް ބޭނުންވާކަމުގައި ފާހަގަކުރައްވާފައެވެ. މީގެ އިތުރުން މަގުހެދުމުގެ މަޝްރޫއާއި ޒުވާނުންގެ މަރުކަޒު އިމާރާތްކުރުމުގެ މަޝްރޫއު ކުރިއަށްގެންގޮސްދެއްވުމަށާއި އަދި ރަށާއި ކައިރީގައި އޮތް ހުޅިމެންދޫ، އެރަށުގެ އިހުތިސާސްތެރޭގައި ހިމަނައިދެއްވައި އެރަށުން އާމްދަނީ ލިބޭނެ މަގުފަހިކޮށްދެއްވުމަށްވެސް ކައުންސިލުން އެދުނެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވާނެކަމަށެވެ.
މިއަދުގެ ބައްދަލުކުރެއްވުމުގައި އެމަނިކުފާނުގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ މާމެންދޫގެ ތަރައްގީއަށް ކުރިއަށްގެންދާ މަޝްރޫއުތަކާއި ރައްޔިތުންގެ ހުރި ކަންބޮޑުވުންތައް ޙައްލުކުރުމަށް ސަރުކާރުން ކުރައްވަމުންދާ މަސައްކަތްތަކުގެ އެންމެ ފަހުގެ މައުލޫމާތުތައް ކައުންސިލާއި ހިއްސާކުރައްވާފައެވެ.
