ލޮސް އެންޖެލިސްގެ އެންމެ މުއްސަނދި އެއް އަވަށުގައި ރޯވެފައިވާ އަލިފާންގަނޑު، އެމެރިކާގެ ނައިބު ރައީސް ކަމާލާ ހެރިސްގެ ގެއާ ކައިރިއަށް ފޯރާފައިވާ ކަމަށް މީޑިއާ ރިޕޯޓުތައް ބުނެއެވެ.
ޕެލިސޭޑްސްގައި ރޯވެފައިވާ އަލިފާންގަނޑު ވަނީ އޭގެ މިސްރާބު ބަދަލުކޮށްލާފައެވެ. މި އަލިފާންގަނޑު މިހާރު މިސްރާބު ޖަހާފައި ވަނީ ބްރަންޓްވުޑް އާ ދިމާއަށެވެ. މިއީ، މުއްސަނދިންނާއި މަޝްހޫރު މީހުން ދިރިއުޅޭ އަވަށެކެވެ.
ނާއިބް ރައީސް ހެރިސްގެ ފަސް މިލިއަން ޑޮލަރުގެ ގަނޑުވަރު ހުންނަނީ މި ހިސާބުގައެވެ.
ބްރަންޓްވުޑްގައި ކުއްލި ހާލަތު އިއުލާންކޮށް މީހުން އެ ސަރަހައްދު ދޫކޮށް ދިއުމަށް އިއުލާން ކޮށްފައި ވެއެވެ. ކެލިފޯނިއާގެ ކުރީގެ ގަވަރުނަރު އާނޯލްޑް ޝްވާޒްނެގަރ އާއި ފިލްމީ ތަރި، މެރިލް ސްޓްރީޕް ވެސް ދިރިއުޅެނީ މި ހިސާބުގައެވެ.
ރާއްޖޭގެ ހިކި ފަސް ސަރަހައްދުގެ ދެބައިކުޅަ އެއްބަޔާ އެއްވަރުގެ ސަރަހައްދެއް އަނދައިގެން ގޮސްފައި ވެއެވެ. އަދި މިހާތަނަށް 16 މީހުން މަރުވެފައިވާ ކަން ކަށަވަރުވެފައި ވެއެވެ. ނަމަވެސް އިތުރު ބަޔަކު ގެއްލިފައިވާ ކަމަށް ބުނެއެވެ. ދޮޅު ލައްކަ މީހުން ބިކަވެ، 12،000 އަށް ވުރެ ގިނަ އިމާރާތާއި އެ އިމާރާތުގައި ހުރި އަގުބޮޑު ސާމާނުތައް ވަނީ އަނދައިގެން ގޮސްފައެވެ.
