ޗައިނާގައި މަތީ ތަޢުލީމު ހާސިލުކުރުމަށް ދެވޭ ސްކޮލަރޝިޕްތަކަށް ކުރިމަތިލުމުގެ ފުރުސަތު މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހުޅުވާލައިފައެވެ.
މި ސްކޮލަރޝިޕްތަކަކީ ޗައިނާ ސަރުކާރުގެ ސްކޮލަރޝިޕް ޕްރޮގްރާމްގެ ދަށުން ދެވޭ ސްކޮލަރޝިޕްތަކެކެވެ. މި ސްކޮލަރޝިޕްތަކުގެ ދަށުން ޗައިނާގެ ކޮންމެ ޔުނިވަރސިޓީއެއް ނުވަތަ ތަޢުލީމީ މަރުކަޒެއްގައި ކިޔެވުމުގެ ފުރުސަތު ލިބިގެންދާނެއެވެ.
މި ސްކޮލަރޝިޕްތަކުގެ ތެރޭގައި ހިމެނެނީ ބެޗްލަރސް ޑިގްރީއަށް އެއް ފުރުސަތާއި، މާސްޓަރސް ޑިގްރީއަށް އެއް ފުރުސަތު އަދި ޕީއެޗްޑީއަށް އެއް ފުރުސަތެވެ. މި ސްކޮލަރޝިޕްތަކުގެ ދަށުން ޓިއުޝަން ފީއާއި، މެޑިކަލް އިންޝުއަރެންސް އަދި ދިރިއުޅުމުގެ ޚަރަދުގެ ބައެއް ހިމެނެއެވެ. މަތީ ތަޢުލީމުގެ ވުޒާރާއިން ވިދާޅުވާ ގޮތުގައި މި ފުރުސަތުތައް ތަފާތު ގިނަ ދާއިރާތަކަކަށް ލިބިގެންދާނެއެވެ.
މި ސްކޮލަރޝިޕްތަކަށް ދަރިވަރުން ހޮވާނީ ޗައިނާ ސަރުކާރުންނެވެ. ވުޒާރާގެ އިޢުލާނުގައިވާ ގޮތުން މި ސްކޮލަރޝިޕްތަކަށް އެދި ހުށަހެޅުމުގެ ފުރުސަތު އޮންނާނީ 15 ފެބްރުއަރީއާ ހަމައަށެވެ.
މީގެ އިތުރުން، ދިވެހިރާއްޖޭގައި ހުންނަ ޗައިނާގެ އެމްބަސީ މެދުވެރިކޮށް ލިބޭ އިތުރު ސްކޮލަރޝިޕްތަކެއްގެ ވާހަކަވެސް މަތީ ތަޢުލީމުގެ ވުޒާރާއިން ވަނީ އިޢުލާނުކޮށްފައެވެ. މި ސްކޮލަރޝިޕްތަކުގެ ތެރޭގައި ހިމެނެނީ ބެޗްލަރސް ޑިގްރީއަށް ދެ ފުރުސަތާއި، މާސްޓަރސް ޑިގްރީއަށް ދެ ފުރުސަތު އަދި ޕީއެޗްޑީއަށް ދެ ފުރުސަތެވެ. މި ސްކޮލަރޝިޕްތަކުގެ ދަށުން ޓިއުޝަން ފީއާއި، ދިރިއުޅުމުގެ ޚަރަދާއި، މެޑިކަލް އިންޝުއަރެންސް އަދި އެލަވަންސް ހިމެނެއެވެ. ވުޒާރާގެ އިޢުލާނުގައިވާ ގޮތުން މި ސްކޮލަރޝިޕްތަކަށް އެދި ހުށަހެޅުމުގެ ފުރުސަތު އޮންނާނީ 30 ޖެނުއަރީގެ މެންދުރު 1:00 އާ ހަމައަށެވެ.
މި އިޢުލާނު ކުރެވިފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2024 ވަނަ އަހަރު ޗައިނާއަށް ކުރެއްވި ރަސްމީ ދަތުރުފުޅުގައި ޗައިނާ ސަރުކާރުން ދިވެހި ދަރިވަރުންނަށް 1,000 ސްކޮލަރޝިޕް ދިނުމަށް އެއްބަސްވުމަށް ފަހުގައެވެ. މި ސްކޮލަރޝިޕްތައް ދޫކުރެވޭނީ ރައީސް މުޢިއްޒުގެ ފަސް އަހަރުގެ ދައުރުގައެވެ. ސަރުކާރުގެ އަމާޒަކީ އަހަރަކު 200 ދަރިވަރުން ޗައިނާއަށް މަތީ ތަޢުލީމު ހާސިލުކުރުމަށް ފޮނުވުމެވެ.
މި ސްކޮލަރޝިޕްތަކާ ބެހޭ އިތުރު މަޢުލޫމާތު ހޯދުމަށް މި ލިންކް އަށް ޒިޔާރަތްކުރެއްވުމަށް މަތީ ތަޢުލީމުގެ ވުޒާރާއިން އިރުޝާދުދެއްވާފައިވެއެވެ.
