ލުބުނާނުގެ ބޮޑު ވަޒީރުކަމަށް ނަން ހުށަހެޅޭތާ އަހަރުތަކެއް ފަހުން، ރައީސް ޖޯސެފް އައުންގެ ވެރިކަމުގައި ފުރަތަމަ ސަރުކާރު އެކުލަވާލުމުގެ މަސައްކަތް ގާޒީ ނަވާފް ސަލާމްއާ ޙަވާލުކޮށްފިއެވެ.
ގާޒީ ނަވާފް ސަލާމަކީ 15 ޑިސެމްބަރު 1953 ގައި ބެއިރޫތަށް އުފަން ބޭފުޅެކެވެ. އދގައި ލުބުނާން ތަމްސީލު ކުރެއްވުމަށްފަހު، 2024 ވަނަ އަހަރުގެ ފެބްރުއަރީ މަހު އޭނާ ވަނީ، ބައިނަލްއަގްވާމީ ކޯޓުގެ ރައީސް ކަމަށް އިންތިޚާބުވެވަޑައިގެން ފައެވެ.
ދުނިޔޭގެ އެންމެ މަތީ ޝަރުއީ އިދާރާގެ ވެރިއަކަށް ސަލާމް އައްޔަން ކުރުމުން އިޒްރޭލުން ކަންބޮޑުވުން ފާޅުކުރިއެވެ. ޖެރޫސަލަމް ޕޯސްޓުން ބެލި ގޮތުގައި ސަލާމަކީ އޭނާގެ ބަޔާންތަކާއި ވާހަކަފުޅުގައި އިޒްރޭލާ ދެކޮޅު ހެދުމުގެ ދިގު ތާރީހެއް އޮތް ބޭފުޅެކެވެ.
ސޯޝަލް މީޑިއާގައި އޭނާ ފާހަގަ ވެގެން ދިޔައީ، 2015 ވަނަ އަހަރު އިސްރާއީލަށް މުޚާތަބުކޮށް ލިޔުއްވާފައިވާ މެސެޖަކުންނެވެ. އެމެސެޖުގައި އިޒްރޭލު ވުޖޫދަށް އައި ދުވަހާ ދިމާކޮށް ވިދާޅުވީ އިޒްރޭލަށް ބާއްޖަވެރިކަމަށް އެދިވަޑައި ނުގަންނަވާ ކަމަށެވެ.
ނަވާފް ސަލާމްގެ ބައްޕަ އަބްދުﷲ ސަލާމަކީ މަޝްހޫރު ވިޔަފާރިވެރިއެކެވެ. އަދި އޭނާއަކީ ލުބުނާންގެ މީޑިލް އީސްޓް އެއާލައިންސްގެ އެއް ބާނީ އެވެ. އޭނާގެ ޚާންދާންގެ ބޭފުޅުންގެ ތެރޭގައި، 1952 އާއި 1973 އާ ދެމެދު ހަތަރު ފަހަރު ލުބުނާނުގެ ބޮޑުވަޒީރުކަން ކުރެއްވި ލުބުނާނުގެ ކުރީގެ ބޮޑުވަޒީރު ސާއިބް ސަލާމް އާއި ކުރީގެ މިނިސްޓަރު އިންޖިނިއަރު މާލިކް ސަލާމް ހިމެނެ އެވެ.
އޭނާގެ ދެބޭންގެ ދެދަރި ބޭފުޅުންގެ ތެރޭގައި ކުރީގެ ބޮޑުވަޒީރު ތައްމާމް ސާއިބް ސަލާމް ހިމެނެ އެވެ.
ނަވާފް ސަލާމް ވަނީ ދެ ޕީއެޗްޑީ ހާސިލުކުރައްވާފައެވެ.
ޕެރިހުގެ އިންސްޓިޓިއުޓް އޮފް ޕޮލިޓިކަލް ސްޓަޑީޒް އިން ޕޮލިޓިކަލް ސައިންސްގެ ދާއިރާ އިން ޕީއެޗްޑީ ހާސިލް ކުރައްވާފައި ވެއެވެ. އަދި ޔުނިވާސިޓީ އޮފް ޕެރިސް ސޯރބޮން އިން ތާރީޚުގެ ރޮނގުން ދެވަނަ ޕީއެޗްޑީ އެއްވެސް ހާސިލު ކުރައްވާފައި ވެއެވެ.
ހާވާޑް ޔުނިވާސިޓީން މާސްޓާ އޮފް ލޯސް ހާސިލް ކުރައްވާފައިވެއެވެ.
އަމަލީ ފެންވަރުގައި ސަލާމް ގާނޫނީ ވަކީލުކަން ކުރެއްވި އެވެ. އަދި ސޯރބޮންގައި ޒަމާނީ ތާރީޚު އިލްމުގެ ލެކްޗަރާއެއްގެ ގޮތުގައި މަސައްކަތް ކުރެއްވިއެވެ.
އެމެރިކަން ޔުނިވާސިޓީ އޮފް ބެއިރޫތުގައި ބައިނަލްއަގްވާމީ ގުޅުންތަކާއި ބައިނަލްއަގްވާމީ ގާނޫނު ކިޔަވައިދެއްވި އެވެ. އަދި 2005 އިން 2007 އަށް ޑިޕާޓްމަންޓް އޮފް ޕޮލިޓިކަލް ސައިންސް އެންޑް ޕަބްލިކް އެޑްމިނިސްޓްރޭޝަންގެ އިސްވެރިޔާގެ މަގާމު އަދާކުރެއްވި އެވެ.
އޭނާގެ ލިޔުންތަކާއި ދިރާސާތަކަށް ބަލާއިރު، ސަލާމްގެ އެންމެ ފަހުގެ ޕަބްލިކޭޝަންތަކުގެ ތެރޭގައި 2021 ވަނަ އަހަރު ބެއިރޫތުގައި ޝާއިއުކުރި "ލެބަނާން ބިޓްވީން ޔެސްޓަރޑޭ އެންޑް ޓޫމޯރޯ" ހިމެނެއެވެ.
