ހީނާމާގެ ޕާކިންގ ސަރަހައްދުން 17 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މަޢުލޫމާތު ދެއްވާފައިވާ ގޮތުގައި، އާންމުންގެ ފަރާތުން އަބަދުވެސް ކަންބޮޑުވުން ފާޅުކުރަމުން އަންނަ ސަރަހައްދެއް ކަމުގައިވާ ހީނާމާގެ ޕާކިންގ ސަރަހައްދަށް އަމާޒުކޮށް، އިއްޔެ ޓާސްކު ފޯހުން ވަނީ ޚާއްސަ ރެއިޑު އޮޕަރޭޝަނެއް ކުރިއަށް ގެންގޮސްފައެވެ. މި އޮޕަރޭޝަންގައި އެ ސަރަހައްދަށް އެއްވެއުޅޭ ބިދޭސީންނާއި، އެ ސަރަހައްދުގައި ބިދޭސީން އިސްވެތިބެ ހިންގަމުންދާ ފިހާރަ، ކެފޭ ފަދަ ތަންތަން ވަނީ ބަލައި ފާސްކޮށްފައެވެ.
އިމިގްރޭޝަނުން އިތުރަށް ހާމަކުރެއްވި ގޮތުގައި، ބަލައި ފާސްކުރެވުނު ތަންތަނުގައި ސައްހަ ވިސާއެއްނެތި ޤަވާއިދާ ަވާއިދާ ޚިލާފަށް މަސައްކަތްކުރަމުންދިޔަ 17 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ.
މީގެ އިތުރުން، ބިދޭސީން ދިރިއުޅޭ ގެތައް ބަލައި ފާސްކުރުމުގެ އޮޕަރޭޝަނެއް އިމިގްރޭޝަނުން ފަށާފައިވާކަމަށާއި، ޤަވާއިދާ ޚިލާފަށް ވިޔަފާރިކޮށް، ސައްޙަ ވިސާއެއްނެތި އުޅެމުންދާ ބިދޭސީން ދެނެގަތުމަށް ޚާއްސަ އޮޕަރޭޝަނެއްވެސް އިމިގްރޭޝަނުން އަންނަނީ ހިންގަމުންނެވެ.
މި އޮޕަރޭޝަންތަކުގެ މަޤްޞަދަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމާއި، އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުން ކަމަށް އިމިގްރޭޝަނުން ބުނެފައިވެއެވެ.
