ޑީޕް ފްލޯ ޓެކްނިކް (ޑީ.އެފް.ޓީ) ސިސްޓަމަކީ ހައިޑްރޮޕޯނިކްސް ނުވަތަ ފެނުގައި ގަސް ހައްދާ ނިޒާމުތަކުގެ ތެރެއިން އެއް ނިޒާމެވެ. މި ނިޒާމުގައި ކާނާގެ ފުން ފެން ފަށަލައެއްގެ އެހީގައި ގަސް ހެއްދުމަށް ފަރުމާކޮށްފައިވާ ނިޒާމެކެވެ. މި ރިޕޯޓުގައި ޑީ.އެފް.ޓީ ސިސްޓަމްގައި ގަސްއިންދުމާ ބެހޭ މުހިންމު މަޢުލޫމާތު ހިމަނާލެވިފައިވާނެއެވެ.
ސިސްޓަމް ތައްޔާރުކުރުން:
ޑީ.އެފް.ޓީ ސިސްޓަމް ފެން ދައުރުވާ ގޮތަށް އަދި ފެން ދައުރުނުވާ ގޮތަށްވެސް ތައްޔާރުކުރެވިދާނެއެވެ. މި ނިޒާމުގައި މުހިންމު ދެ ކަމަކީ ކާނާ މެނޭޖްކުރުމާއި ގަހަށް ބޭނުންވާ އޮކްސިޖަން ފޯރުކޮށްދިނުމެވެ. ފެން ފުންމިން 4-6 އިންޗި އާ ދެމެދު ބެހެއްޓުން އެދެވިގެންވެއެވެ. ސިސްޓަމް ތައްޔާރުކުރުމަށް ފުޅިމަދު ފޮށި، ޓްރޭ، ޕީވީސީ ހޮޅި ނުވަތަ ބާލިދީ ބޭނުންކުރެވިދާނެއެވެ.
ފެން:
ރާއްޖޭގައި ޑީ.އެފް.ޓީ ސިސްޓަމަށް އެންމެ އެކަށީގެންވާ ފެނަކީ ވާރޭފެނެވެ. ވަޅުފެން ބޭނުންކުރުމުން ކާނާ އެއްކުރުމާއި ޕީ.އެޗް ބެލެންސްކުރުމަށް ދަތިވެ، ގަހުގެ ހެދުމަށް ނޭދެވޭ އަސަރުކުރެއެވެ.
މުޑުވައްކުރުން:
ސިސްޓަމުގައި އިންދުމަށް އޮށް މުޑުވައްކުރަން ރަނގަޅީ ކުނޑި، ޖަރާސީމު އަދި ފަސް ނުހިމެނޭ އެއްޗެއްގައެވެ. އާންމުކޮށް ސްޕޮންޖު ބޭނުންކުރެވެއެވެ. ލެޓިއުސް ފިޔަވައި އެހެން ބާވަތްތަކުގައި ކޮންމެ އޮށެއް ވަކި ގަހެއްގެ ގޮތުގައި ހައްދަން ޖެހެއެވެ.
ބެލެހެއްޓުން:
ސިސްޓަމް ތައްޔާރުކޮށް ގަސްތައް ބަދަލުކުރުމުގެ ކުރިން، ބްލީޗް ފެނުން ސިސްޓަމް ރަނގަޅަށް ސާފުކުރަންވާނެއެވެ. ކޮންމެ ދުވަހަކު އީ.ސީ މީޓަރާއި ޕީ.އެޗް މީޓަރުން ކާނާ ފެނުގެ މިންގަނޑު ބަލައި، ބޭނުންވާ ބަދަލުތައް ގެންނަންވާނެއެވެ.
ޑީ.އެފް.ޓީ ސިސްޓަމަކީ ކަރަންޓުގެ ކުޑަ ޚަރަދަކުން ހިންގޭ، ޚަރަދު ކުޑަ މެޓީރިއަލް ބޭނުންކުރެވޭ، އަދި ވަރުގަދައަށް ދިގުކޮށް މޫހެދޭ ގަސްތައް ހެއްދުމަށް އެކަށޭނަ ނިޒާމެކެވެ. މި ނިޒާމުގައި ގަސްއިންދުމުގައި އިސްވެ ދެންނެވުނު ކަންކަމަށް ސަމާލުކަން ދިނުމުން ކާމިޔާބު ނަތީޖާއެއް ހާސިލުކުރެވޭނެއެވެ.
ދަނޑުވެރިކަމާއި ގުޅޭ މިފަދަ ތަފާތު ގިނަ ފަންނީ މައުލޫމާތު "ދަނޑުވެރިޔާ" ޕޯޓަލް އިން ލިބެން ހުންނާނެއެވެ.
ދަނދުވެރިޔާ ޕޯޓަލް ލިންކް: https://dhanduveriya.gov.mv/knowledge-base
