މަކުނުވިދުރި ފެނުގެން ސިއެރާ ލިއޯންގައި ސިއްޙީ ކުއްލި ނުރައްކަލުގެ ހާލަތު އިއުލާން ކޮށްފިއެވެ. މިހާތަނަށް މި ބަލީގެ 2 ކޭސްއެއް ވަނީ ފެނިފައެވެ.
މިދިޔަ ހަފްތާގައި ސިއެރާ ލިއޯން އިން ވަނީ އެމްޕޮކްސް ޖެހިފައިވާ ފުރަތަމަ ކޭސް ފެނިގެން އެލާޓް ލެވެލް މަތިކޮށްފައެވެ. އޭގެ ދެދުވަސްފަހުން ދެވަނަ ކޭސްއެއް ފެނިފައިވަނީ ޖެނުއަރީ 6 ގައެވެ.
އާންމު ސިއްހަތުގެ ކުއްލި ނުރައްކަލުގެ ހާލަތުގައި "ބަލި ކޮންޓްރޯލް ކުރުމަށް ބޭނުންވާ ވަސީލަތްތައް ހޯދައި، އިތުރަށް ބަލި ފެތުރުން ހުއްޓުވުމަށާއި، ބަލިޖެހިފައިވާ މީހުންނަށް ފަރުވާ ދިނުމަށް ވަގުތުން ފިޔަވަޅު އެޅުމުގެ ފުރުސަތު ލިބިގެންދާނެ" ކަމަށް އެގައުމުގެ ހެލްތު މިނިސްޓަރު ވިދާޅުވި އެވެ.
ސިއެރާ ލިއޯނުން ވަނީ ބޯޑަރު ސަވައިލެންސާއި ޓެސްޓިން އިތުރު ކޮށް ގައުމީ ހޭލުންތެރިކުރުމުގެ ކެމްޕޭނެއް ފަށާނެކަމަށް އިއުލާންކޮށްފަ އެވެ.
ސިއެރާ ލިއޯންގެ މެޑިކަލް ސިސްޓަމް މަކުނުވިދުރިއާ ކުރިމަތިލުމުގެ ގާބިލުކަން ހުރި ކަމަށް ހެލްތު މިނިސްޓަރ ވިދާޅުވެއެވެ. މީގެ ކުރިން އިބޯލާ އާއި ކޯވިޑް-19 ކޮންޓްރޯލު ކުރުމުގައި ލިބުނު ތަޖުރިބާ ބޭނުންކުރާނެ ކަމަށް ސިއެރާލިއޯނުން ބުނެއެވެ.
