ހުޅުމާލޭގެ ދެވަނަ ފިޔަވަހީގައި ހުރި ޓްރާންސްފޯމަރަކަށް ގެއްލުންދީ، އޭގެން ވައްކަންކުރަން އުޅުނު މީހާ ހުއްޓުވި ސްޓެލްކޯގެ މުވައްޒަފަށް ދިން ހަމަލާ، ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ހަރުކަށި އިބާރާތުން ކުއްވެރި ކޮށްފިއެވެ.
ފަހުމީ މިކަން ކުއްވެރި ކޮށްފައިވަނީ މިހަމަލާއާ ގުޅިގެން އެމަނިކުފާނު ރޭ އެކްސްގައި ކޮށްފައިވާ ޕޯސްޓެއްގައެވެ.
ސްޓެލްކޯ މުވައްޒަފަށް އެމީހާ ރެންޗަކުން ހަމަލާ ދިނުމުގެ ސަބަބުން އަނގަމައްޗާއި ބުމަ ކައިރިއަށް ވަނީ ޒަހަމްތަކެއް ލިބިފައެވެ.
ފަހުމީ ވިދާޅުވި ގޮތުގައި، ބޮޑު ރެންޗަކުން މުވައްޒަފުގެ ބޮލުގައި ޖެހުމުން އޭނާ ދާއިމީ ނުކުޅެދުންތެރިކަމަކުން ނުވަތަ މަރުން ސަލާމަތްވީ ކިރިޔާއެވެ. އަދި މުވައްޒަފުގެ ކެރުންތެރިކަން ފާހަގަކޮށް، ޓީމަށް ކުރިމަތިވެދާނެ ކޮންމެ ނުރައްކާތެރިކަމެއް ސީރިއަސްކޮށް ނަގާނެ ކަމަށާއި ސްޓެލްކޯގެ ހުރިހާ މުވައްޒަފުންގެ ރައްކާތެރިކަން ކަށަވަރުކުރައްވާނެ ކަމުގެ ޔަގީންކަން ދޭ ކަމަށްވެސް ފަހުމީ ވަނީ ވިދާޅުވެފައެވެ.
މި ޓްރާންސްފޯމަރަށް ދިން ގެއްލުމާ ގުޅިގެން ހުޅުމާލޭ ދެވަނަ ފިޔަވަހީގެ އެމްޕީއެލް ޓަވަރުތަކުން ކަރަންޓުގެ ހިދުމަތް މެދުކެނޑުނެވެ. އަދި ޓްރާންސްފޯމަރުން ވައްކަން ކުރަން އުޅުނު މީހާ ވަނީ ފުލުހުންނާ ހަވާލުކޮށްފައެވެ.
މީގެ ދެތިން ދުވަސް ކުރިންވެސް ހުޅުމާލޭގައި ބަހައްޓާފައި ހުރި ސްޓެލްކޯގެ ޓްރާންސްފޯމަރަކަށް ވަގުންގެ ގްރޫޕަކުން ވަނީ ގެއްލުން ދީފައެވެ.
