ޗައިނާގައި އާބާދީ ދަށްވަމުން ދިއުމާ ގުޅިގެން ރައްޔިތުންނަށް މާލީ އިނާޔަތްތައް ދީގެން އިތުރަށް ކުދިން ހޯދުމަށް ދަނީ ހިތްވަރު ދެމުންނެވެ. އެމަސައްކަތުގެ ނަތީޖާ އެއް ޕްރޮވިންސުން ފެންނަމުން ދާކަމަށް ރިޕޯޓުކޮށްފައި ވެއެވެ.
ނިމިދިޔަ 2024 ވަނަ އަހަރު ހޫބެއިގެ ސިޓީއެއްގައި އަލަށް އުފަންވި ކުދިންގެ އަދަދު 17 ޕަސެންޓަށް އިތުރުވެފައިވާ ކަމަށް ދައްކައެވެ. މިއީ 2016 ވަނަ އަހަރުން ފެށިގެން މެދުނުކެނޑި ވިހާ ނިސްބަތް ދަށްވިފަހުން ޗައިނާއަށް ލިބުނު އުފާވެރި ޚަބަރެކެވެ.
މެދުތެރޭ ޕްރޮވިންސް ހުބެއިގެ ގާތްގަނޑަކަށް އެއް މިލިއަން މީހުންގެ އާބާދީއެއް އޮންނަ ސިޓީއެއް ކަމަށްވާ ޓިއަންމެންގައި މިދިޔަ ހަފްތާގައި އާންމުކުރި ސަރުކާރުގެ ހިސާބުތަކުން ދައްކާ ގޮތުގައި 2023 ވަނަ އަހަރަށް ވުރެ މިދިޔަ އަހަރު 1،050 ކުދިން އަލަށް އުފަންވެފައި ވެއެވެ.
އާބާދީ އިތުރު ކުރުމަށް ކުދިން ހޯދުމަށް ހިތްވަރު ދިނުމަށް، ސަރަހައްދީ ސަރުކާރުތަކުންނާއި ކުންފުނިތަކުންވެސް މަސައްކަތް ފަށާފައި ވެއެވެ.
ޗައިނާގެ ކަރަންޓުން ދުއްވާ އުޅަނދު އުފައްދާ އެކްސްޕެންގް ކުންފުނިން ވަނީ ތިން ވަނަ ކުއްޖަކު ހޯދާ މުވައްޒަފަށް 30،000 ޔުއާން (4،091 އެމެރިކާ ޑޮލަރު) ގެ ފައިސާގެ އިނާމެއް ދޭނެ ކަމަށް އިއުލާންކޮށްފަ އެވެ. މިކުންފުނީގައި 13 ހާސް މުވައްޒަފުން ހިމެނެއެވެ.
ހުބެއި ޑެއިލީން ބުނާ ގޮތުގައި، މިދިޔަ އަހަރަށް ވުރެން 16 ޕަސެންޓް އިތުރަށް އެ ޕްރޮވިންސްގައި ކުދިން ވިހާފައި ވެއެވެ.
ތިންވަނަ ކުއްޖާ ހޯދާ ދެމަފިރިއަކަށް ހިތްވަރު ދިނުމަށް ގެއެއް ގަތުމަށް 120،000 ޔުއާންގެ ކޫޕަނެއް ދީ، އަދި އެއްފަހަރާ 3،000 ޔުއާންގެ ނަގުދު ފައިސާ ދިނުމުގެ އިތުރުން، ކުއްޖާއަށް ތިން އަހަރު ފުރެންދެން މަހަކު 1،000 ޔުއާންގެ ސަބްސިޑީއެއް ދިނުންވެސް ހިމެނެއެވެ.
