ޓާރްޓޫގެ މޭޔަރ އަރްމަސް ކްލާސް ދިވެހިރާއްޖޭގެ "ފްލޯޓިންގ ސިޓީ" މަޝްރޫއާމެދު ޝައުގުވެރިކަން ފާޅުކުރައްވައިފިއެވެ.
ޓާރްޓޫގެ މޭޔަރ މި މަޝްރޫއުއަށް ޝައުގުވެރިކަން ފާޅުކުރައްވައިފައިވަނީ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، އެސްޓޯނިއާއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން، ޓާރްޓޫގެ މޭޔަރ އަރްމަސް ކްލާސް ދެއްވި ފަރިއްކޮޅެއްގައި ބައިވެރިވެވަޑައިގެން ކުރެއްވި މަޝްވަރާކުރެއްވުމުގައެވެ.
ޓާރްޓޫގެ މޭޔަރ އަރްމަސް ކްލާސްގެ އިތުރުން ފަރިއްކޮޅުގެ ބައިވެރިންވެސް ވަނީ މަޝްރޫއާމެދު ޝައުގުވެރިކަން ފާޅުކުރައްވާފައެވެ. ރައީސް ވަނީ، އެ މަޝްރޫއު ފަރުމާކުރައްވާފައިވަނީ ދެމެހެއްޓެނިވި ގޮތެއްގައި ކަމާއި، އޭގެ ސަބަބުން ދިވެހިންނަށް ލިބޭނެ ފައިދާ އާއި، މޫސުމީ ބަދަލުތަކަށް ވިލުންތެރި އަރބަން ތަރައްގީގެ ނަމޫނާއެއްގެ ގޮތުގައި އެ ސިޓީ ވެގެންދިއުމަށް އޮތް ފުރުސަތުގެ މައްޗަށް އަލިއަޅުއްވާލައްވާފައެވެ.
ޔުނިވަރސިޓީ އޮފް ޓާރްޓޫގެ ރެކްޓަރ ޓޫމަސް އައްސެރް އާއި އެސްޓޯނިއަން ނޭޝަނަލް މިއުޒިއަމްގެ ޑިރެކްޓަރ ޑޮކްޓަރ ކޭޓޫ ސަކްސް އާއި އެސްޓޯނިއަން ބަޔޯބޭންކްގެ ހެޑް އަދި ޔުނިވަރސިޓީ އޮފް ޓާރްޓޫގެ އިންސްޓިޓިއުޓް އޮފް މޮލިކިއުލަރ އެންޑް ސެލް ބަޔޮލޮޖީގެ ޕްރޮފެސަރ ލިލީ މިލާނީ އާއި، ޓާރްޓޫ ސަރުކާރުގެ އިސް އޮފިޝަލުންވެސް މި ފަރިއްކޮޅުގައި ބައިވެރިވެވަޑައިގަތެވެ.
މި ފަރިއްކޮޅުގައި ދެ ގައުމުގެ ދޭދޭ ގުޅުން ބަދަހިކުރުމާ ގުޅޭގޮތުންނާއި، އެކުގައި މަސައްކަތްކުރެވޭނޭ ގޮތްތަކާ ގުޅޭގޮތުން މަޝްވަރާކުރައްވައި، ރާއްޖެ އާއި އެސްޓޯނިއާ އާ ގުޅޭ ތަފްސީލުތައް ބައިވެރިން ހިއްސާކުރައްވާފައިވެއެވެ. ބައިވެރިން ވަނީ އެސްޓޯނިއާގެ ތަގާފަތާއި މުއްސަނދި ތާރީހާއި، ތަރިކަ އަދި އާބާދީގެ ޑައިނެމިކްސްގެ އިތުރުން އެ ގައުމުގެ މުސްކުޅިވަމުން އަންނަ އާބާދީ އަށް ހުރި ގޮންޖެހުންތަކާމެދުވެސް މަޝްވަރާކުރައްވާފައެވެ.
މީގެއިތުރުން ރައީސް ވަނީ، އެސްޓޯނިއާގެ އެހީތެރިކަން ބޭނުންވާ ދާއިރާތަކުގެ މައްޗަށް އަލިއަޅުއްވާލައްވާފައެވެ. އެގޮތުން، އާންމު ހިދުމަތްތަކާއި، ތައުލީމާއި، އިއާދަކުރަނިވި ހަކަތައިގެ ދާއިރާ ކުރިއެރުވުމުގައި އިސްކޮށްފައިވާ ޑިޖިޓަލް އީޖާދާއި، އީ-ގަވަނަންސްގެ އެހީގައި ގައުމީ ތަރައްގީގެ ލަނޑުދަނޑިތައް ހާސިލުކުރުމުގައި ހޯދާފައިވާ ކުރިއެރުމުގެ އަލީގައި އެހީތެރިކަން ބޭނުންފުޅުވާކަން ފާހަގަކުރައްވާފައިވެއެވެ.
