އަޤްޞާ ޠޫފާނަކީ، ތާރީޚުގެ ޞަފްޙާތަކުގައި ރަންއަކުރުން ލިޔެވޭނެ މިނިވަންކަމުގެ ހަނގުރާމައެއް ކަމަށް ޣައްޒާގެ ހަމާސްގެ ލީޑަރު އަދި އެ ޖަމާއަތުގެ ފަރާތުން ޤަތަރުގެ މަޝްވަރާ ވަފްދުގައި ބައިވެރިވެ ވަޑައިގަތް އިސްވެރިޔާ ޑރ. ޚަލީލް އަލްޙައްޔާ ވިދާޅުވެއެވެ. އަދި އަޤްޞާ ޠޫފާނަކީ، ފަލަސްޠީނު މީހުންގެ މިނިވަންކަމުގެ ހަކަރާތް ބަދަލުކޮށްލި ހާދިސާކަމަށްވެސް އޭނާ ވިދާޅުވިއެވެ.
އަޤްޞާ ޠޫފާނުގެ ނަތީޖާ މިހާހިސާބުން އަދި ނުނިމޭނެ ކަމަށާއި، "ޤައްސާމް ބްރިގޭޑުން ކުރި މަސައްކަތްތަކުގެ ނަތީޖާއާއި ދުޝްމަނުންނަށް ދިން ގެއްލުން، ތާރީޚުގެ ފަށްފުށްތަކުގައި އަބަދަށް ދެމިއޮންނާނެ ހަނގުރާމައެއްގެ ގޮތުގައި ފަވާލެވިފައިވާނެ" ކަމުގައި ވިދާޅުވިއެވެ.
ހަނގުރާމަ ހުއްޓާލުމުގެ އެއްބަސްވުން އިއުލާން ކުރުމާ ގުޅިގެން ޓީވީން ދުރަށް ދެއްކި ޑރ. އަލްޙައްޔާގެ ތަޤްރީރުގައި ވިދާޅުވީ، "އެންމެ ޝަރަފުވެރި ހަނގުރާމައިގައި، މަތިވެރި މަޤްޞަދެއްގައި ޝަހީދުވި ހުރިހާ އަބްޠާލުންނަށް" ސަލާމް ތަޢުޒީމު އަދާކުރައްވާ ކަމަށެވެ. އަދި ފަލަސްޠީނުގެ ރައްޔިތުން އެމީހުންގެ ހައްޤުތައް ފުރިހަމައަށް ހޯދާނެ ކަމީ ޔަގީން ކަމެއް ކަމަށާއި އަދި ފޭރިގެންފައިވާ ބިންތަކާއި މާތް ބިންތަކާއި އަޤްޞާ އަނބުރައި ލިބޭނެ ކަން ޔަގީން ކުރައްވާ ކަމަށް ވިދާޅުވިއެވެ.
"އަޅުގަނޑުމެންގެ ރައްޔިތުންގެ ސާބިތުކަމާއި ދުޝްމަނުންނާ ދެކޮޅަށް އެމީހުން ދިން ޙަމަލަތަކާއި ހިތްވަރަކީ ދުޝްމަނުންގެ ރޭވުންތައް ނާކާމިޔާބުވި މަސައްކަތްތައް" ކަމަށް ވެސް އަލްހައްޔާ ފާހަގަކުރެއްވި އެވެ.
އޭނާ އިތުރަށް ވިދާޅުވީ، "އަޅުގަނޑުމެންގެ ރައްޔިތުންގެ ޙައްޤުތަކަށް އުނިކަމެއް ގެންނަ އދި ޤުރުބާނީތައް ހަނދާން ނައްތާލާނެ އެއްވެސް ފަރާތަކަށް މައާފެއްވެސް ނުކުރެވޭނެ" ކަމަށެވެ.
އަލްހައްޔާ ސިފަކުރެއްވި ގޮތުގައި ޣައްޒާގައި އިޒްރޭލުން ހިންގާ ދުނިޔޭގެ އެންމެބޮޑު ކޮންސެންޓްރޭޝަން ކޭމްޕް މިނިވަން ކުރުމަށް 467 ދުވަސް ތެރޭ ކުރި މަސައްކަތާއި އެކަމާ ދެކޮޅަށް، އިޒްރޭލުން ހިންގި އުދުވާނަކީ އިންސާނުންގެ ހަނދާނުގައި އަބަދަށް ބިންވަޅު ނެގިފައިވާނެ، އަދި ޒަމާނީ ތާރީޚުގައި ފެނުނު އެންމެ އަނިޔާވެރި ހަމަލަތައް ކަމަށާއި އެއީ ދުނިޔެއިން ނުލަފާ އުދުވާނެއް ކަމަށް ދެކޭނެ ކަމެއް ކަމަށް ވިދާޅުވިއެވެ.
މިނިވަންކަމުގެ ހަނގުރާމައިގައި، ޙަމާސްގެ ޝަހީދު ޤައްސާމް ބްރިގޭޑާއެކު ހަނގުރާމަ ކުރި، އިސްލާމިކް ޖިހާދުގެ "ހަތިޔާރު އެޅި އަޚުން" ކޮށްފައިވާ މަސައްކަތަށްވެސް އޭނާ ޝުކުރު އަދާ ކުރެއްވިއެވެ.
އަލްޙައްޔާ ވަނީ ލުބުނާންގެ އަޚުންނާއި ޙިޒުބުﷲގެ އެތައް ސަތޭކަ ޝަހީދުންނާއި ލީޑަރުންނާއި މުޖާހިދުންގެ މަތިން ހަނދާންކުރައްވައި އެފަރާތްތަކުގެ ޝުހަދާއިންގެ އަގު ވަޒަން ކުރައްވައި އެފަރާތްތަކަށްވެސް ޝުކުރު އަދާކުރައްވާފއެވެ. އަދި ޙުއްޖަތުލްއިސްލާމް ޙަސަން ނަޞްރަﷲގެ ނަން ވަކިން ޚާއްސަކޮށް ފާހަގަ ކުރެއްވިއެވެ. އޭގެ އިތުރުން ލުބުނާންގެ އިސްލާމީ ޖަމާޢަތާއި ޔަމަނުގެ އަންޞާރުﷲއަށް ވެސް ޝުކުރު އަދާކުރެއްވިއެވެ.
