ކުރިއަށްއޮތް 24 ގަޑިއިރު އުތުރާއި މެދުރާއްޖެތެރޭގެ ރަށްތަކަށް މޫސުން ގޯސްވާނެކަމަށާއި އެކަމަކު އެންމެ ބޮޑަށް މޫސުން ގޯސްވާނެ ކަމަށް ލަފާ ކުރެވެނީ ކުރިއަށް އޮތް ހުކުރު ދުވަހުކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެވެ.
ރާއްޖޭގެ އިރުން، ބޭ އޮފް ބެންގާލުގައި އުފެދިފައިވާ ކޮޅިގަނޑާ ގުޅޭ ގޮތުން ދައުލަތުގެ މީޑިޔާއަށް މޫސުމާބެހޭ ޤައުމީ އިދާރާއިން ދެއްވި މައުލޫމާތުގައި ވިދާޅުވީ ކުރިއަށް އޮތް 24 ގަޑިއިރު އުތުރާއި މެދުރާއްޖެތެރޭގެ އެކި ހިސާބުތަކަށް ގުގުރުމާއެކު ވިއްސާރަކުރާނެކަމަށާއި އަދި ބައެއް ރަށްތަކަށް ބޯކޮށް ވާރޭވެހުން އެކަށީގެންވާކަމަށެވެ. އަދި ދެކުނުގެ އަތޮޅުތަކަށްވެސް ކެރީގެ އަސަރު ކުރާނެކަމަށް އެ އިދާރާއިން ވިދާޅުވެއެވެ.
ކުރިއަށް އޮތް 24 ގަޑިއިރާއި ހުކުރު ދުވަހު، ކަނޑު ދަތުރު ކުރައްވާ ފަރާތްތަކުން މޫސުމަށް ސަމާލުކަން ދެއްވައިގެން ދަތުރު ކުރެއްވުމަށް މޫސުމާ ބެހޭ ގައުމީ އިދާރާއިން އިލްތިމާސް ކުރައްވައެވެ.
