އިނގިރޭސި ޕްރިމިއަރ ލީގުގެ ޗެމްޕިއަންކަން ލިބޭނެ ދުވަހެއްގެ އިންތިޒާރުގައި ތިބި އާސެނަލްގެ ސަޕޯޓަރުންގެ ހިތްތައް އެކްލަބުން ރޭ އަނެއްކާވެސް ތަޅުވާލައިފިއެވެ.
އާސެނަލްއިން އެކްލަބުގެ ސަޕޯޓަރުންގެ ހިތްތަޅުވަން ފެށީ، އުތުރު ލަންޑަން ޑާބީގައި ރޭ 2-1 އިން ޓޮޓެންހަން ބަލިކޮށް ތާވަލުގެ އެއްވަނައަށް އެރުމުގެ އުއްމީދު އާކޮށްގެންނެވެ. މިވަގުތު 47 ޕޮއިންޓާއެކު އެއްވަނައިގައި އޮތީ ލިވަޕޫލެވެ. އާސެނަލް ދެވަނައިގައި އޮތީ 43 ޕޮއިންޓާއެކުއެވެ. އާސެނަލް ވަނީ ލިވަޕޫލަށްވުރެ އިތުރަށް އެއްމެޗް ކުޅެފައެވެ. އެހެންކަމުން ތާވަލުގެ ކުރީގައި 7 ޕޮއިންޓަށް ލީޑް ފުޅާކޮށްލުމުގެ އަމިއްލަ ބާރު ލިވަޕޫލަށް އެބައޮތެވެ.
ރޭ، އާސެނަލް ސަޕޯޓަރުން ތަޅުވާލުމަށްފަހު ލީޑް ނެގީ ޓޮޓެންހަމުންނެވެ. ފަންސަވީސް ވަނަ މިނެޓުގައި މި ލަނޑު ކާމިޔާބުކޮށްދިނީ ކެޕްޓަން ސޮން ހިއުން މިންއެވެ. އެކަމަކު ފުރަތަމަ ހާފް ނިމެން ދަނިކޮށް ސޮލަންކޭ އަތުން ބައިކޮޅަށް ވަން ލަނޑުންނާއި ލިންދްރޯ ޓްރޮއްސާޑުގެ ލަނޑުން އާސެނަލް ސަޕޯޓަރުންގެ ހިތްތައް މައިތިރިވީއެވެ.
އާސެނަލްއަށް އެންމެފަހުން އިނގިރޭސި ޕްރިމިއަރ ލީގުގެ ޗެމްޕިއަންކަން ހޯދިފައި ވަނީ މީގެ 21 އަހަރު ކުރިން ކޯޗް އާސެން ވެންގާގެ އިރުޝާދުގެ ދަށުން 2003/04 ސީޒަނުގައެވެ. ޗެމްޕިއަންކަން ހޯދީ އެއްވެސް މެޗަކުން ބަލިނުވެއެވެ. އެއީ އާސެނަލްގެ ސަޕޯޓަރުންގެ ހިތްތަކުން ހަނދާންތައް ނުފިލާނެ "އިންވިންޒިބަލް" ޕްރިމިއަރ ލީގް ކެމްޕެއިނެވެ.
2023 ވަނަ އަހަރު، ޕްރިމިއަރ ލީގުގެ ޗެމްޕިއަންކަން ހޯދުމާ ވަރަށް ކައިރިއަށް އާސެނަލް ޖެހިލިއެވެ. އެކަމަކު އެންމެފަހު 2 ހަފްތާ ތެރޭ ގޮފިގަނޑުން ވެއްޓި ޕްރިމިއަރ ލީގް ތަށި އާސެނަލްއަށް ގެއްލުނީއެވެ.
