ޕާކިސްތާންގެ ދައުލަތުގައި ނިޒާމުން މީހުން ގެއްލުމުގެ މައްސަލައަކީ ގޮން ޖެހުން ބޮޑު މައްސަލައެއް ކަމަށާއި އެ މައްސަލައަކީ ޕާކިސްތާން ބޮޑުވަޒީރަށާއި ކެބިނެޓަށް ބޮޑު ގޮންޖެހުމެއް ކަމަށް ލޯ މިނިސްޓަރު އައުޒަމް ނަޒީރު ތަރާރު ޕާކިސްތާންގައި ސެނެޓަށް މައުލޫމާތު ދެއްވައިފިއެވެ.
ޕާކިސްތާން ސެނެޓުން ވަނީ ބައެއް ޕްރޮވިންސްތަކުގައި ގާނޫނުގެ ބާރު ދެމެހެއްޓުމަށް ގޮން ޖެހުންތައް ކުރިމަތި ވެފައިވާތީ އެމައްސަލާގައި ވަޒީރާ ސުއާލު ކޮށްފައެވެ.
"އަޅުގަނޑުމެން ގަބޫލުކުރާ ގޮތުގައި ޕާކިސްތާނުގެ ދައުލަތް ހިންގަން ޖެހޭނީ ޑިމޮކްރެޓިކް ހުދޫދުގެ ތެރޭގައި.،" ޕާކިސްތާންގައި ނިޒާމުން މީޙުން ގެއްލުން އާންމު މައްސަލައަކަށް ވެފައިވާ މައްސަލަ ހުށަހަޅުއްވަމުން، ޖަމުއިއްޔަތޭ އުލަމާއޭ އިސްލާމް (ފަޒުލު)ގެ ޕާލަމެންޓްރީ ލީޑަރު ކަމްރާން މުރުތާޒާ ސެނެޓުގައި ވިދާޅުވި އެވެ.
ގާނޫނީ އިމުގެ ތެރެއިން ކުރެވެން ހުރި ހުރިހާ ކަމެއް ކުރެވޭނެ ކަމުގެ ޔަގީންކަން ލޯ މިނިސްޓަރު ދެއްވި އެވެ. ލޯ މިނިސްޓަރު ވިދާޅުވީ ގެއްލިގެން ހޯދަމުންދާ މީހުންނާ ބެހޭ ކޮމިޝަން ބޮޑު ވަޒީރު ޝެހްބާޒް ޝަރީފް ގެ ސަރުކާރުން އަލުން އެކުލަވާލާފައިވާ ކަމަށާއި އެ ކޮމިޝަންގެ ރިއާސަތު ބަލަހައްޓަވަނީ، ސުޕްރީމް ކޯޓުގެ ރިޓަޔާޑް ފަނޑިޔާރަކު ކަމަށް ވިދާޅުވިއެވެ.
ޕާކިސްތާންގެ ގާނޫނުއަސާސީގެ 245 ވަނަ މާއްދާގެ ދަށުން އެ ކޮމިޝަނަށް ތަހުގީގަށް، ސަލާމަތީ އިދާރާތައް ހާޒިރު ކުރެވޭނެ ކަމަށާއި ނަމަވެސް ގާނޫނާއި ގަވާއިދު ދެމެހެއްޓުމަކީ ޕްރޮވިންސްތަކުގެ ޒިންމާއެއް ކަމަށް ވަޒީރު ފާހަގަކުރެއްވި އެވެ.
