އެމެރިކާގެ ކުރީގެ ރައީސް ޖޯން ކެނެޑީ އަވަހާރަކޮށްލި ހާސިދާގެ ފައިލްތައް ވަނީ 150 އަހަރަށް ސިއްރު ކުރެވިފައެވެ. ނަމަވެސް ޓްރަމްޕް ވިދާޅުވަނީ އޭނާގެ ވެރިކަމުގައި އެ ފައިލްތައް ހާމަ ކުރައްވާނެ ކަމަށެވެ.
ޓްރަމްޕް އަވަހާރަ ކޮށްލުމަށް ދީފައިވާ ހަމަލައާއި ޓްރަމްޕް ޓަވަރަށް ދިން ޙަމަލައިން ޝައްކު ކުރެވެނީ، އަޑީ ދައުލަތުން ކެނެޑީއަށް ހެދިގޮތަށް ޓްރަމްޕަށްވެސް ހަދައިފާނެ ކަމަށެވެ.
ކެނެޑީ އަވަހާރަ ކޮށްލީ ކާކު ހެއްޔެވެ؟
ކެނެޑީ އަވަހާރަކޮށްލި ހާދިސާއާ ގުޅޭ އައު އޯޑިއޯއެއް ވަނީ ފާއްދާލާފަ އެވެ. މަސްއޫލު ފަރާތަކުން އެ ޓޭޕްގެ ސައްހަކަން ކަށަވަރު ކޮށެއް ނުދެއެވެ. ނަމަވެސް ޓްރަމްޕް ވެރިކަމަށް ވަޑައިގަތުމާއި ޓްރަމްޕްގެ ވަށައިގެންވާ ނުރައްކާ، ޚުޠޫރަތްތެރި ހާލަތަށް ކޮންމެވެސް ބަޔަކު އިންޒާރު ދެއެވެ.
ކެނެޑީ އަވަހާރަ ކޮށްލުމުގެ ކަންކަން ރާވައި ހިންގީ އެމެރިކާގެ ކުރީގެ ރައީސް ލިންޑަން ބީ ޖޯންސަން ކަމަށް މިހާރު ތުހުމަތު ކުރެވެއެވެ.
މި ހާދިސާއާ ޖޯންސަންއާ ގުޅުވާލެވެނީ، މިހާރު ތިލަކޮށްފައިވާ އާ އޯޑިއޯ ޓޭޕުންނެވެ. މީސްމީޑިއާގައި އާންމުކޮށްފައިވާ މި ޓޭޕްގައި ޑިމޮކްރެޓިކް ޕާޓީގެ ކުރީގެ އިސް މެމްބަރެއް ކަމަށްވާ، ކްލިފްޓަން ކާޓާ "އެއްބަސްވެފައި ވަނީ" ރައީސް ޖޯންސަން "ކެނެޑީ، އަވަހާރަކޮށްލުމަށް މެކް ވޮލެސް ކުއްޔަށް ހިފި" ކަމަށެވެ.
މި އޯޑިއޯ ޓޭޕް ވަނީ މީސްމީޑިއާގެ އެތައް ޕްލެޓްފޯމެއްގައި ފުޅާދާއިރާއެއްގައި ހިއްސާކޮށްފައެވެ.
މިހާތަނަށް ކެނެޑީ އަވަހާރަކުރި ހާދިސާ ވިޔެފައި ވަނީ، ލީ ހާވީ އޮސްވާލްޑްގެ ވަށައިގެންނެވެ. ކެނެޑީ އަވަހާރަކޮށްލި ހާދިސާ ތަހުގީގު ކުރި ވޮރެން ކޮމިޝަނުން ނިންމާފައި ވަނީ، ލީ ހާވީ އޮސްވާލްޑަކީ މިކަމުގައި އުޅުނު ހަމައެކަނި ޤާތިލު ކަމަށެވެ.
ނަމަވެސް އަލަށް ހާމަވެފައިވާ މަޢުލޫމާތުން، މެލްކަމް ވޮލެސްގެ ޖިނާއީ ޖަރީމާތައް ހިންގުމުގެ މާޒީއާއި ޖޯންސަންއާއި އޭނާގެ ރަހުމަތްތެރިކަމަކީ، ކެނެޑީ އަވަހާރަކޮށްލި ހާދިސާގެ ވަށައިގެންވާ ވާހަކަތަކާ މެދު ޝައްކުގެ ނަޒަރަކުން ބަލާ ފަރާތްތަކުން ކުރިން ފާހަގަ ކޮށްފައިވާ ކަންކަމެވެ.
ސިއްރުކޮށްފައިވާ ފައިލްތައް، ޓްރަމްޕް ހާމަ ކުރައްވައިފިނަމަ، ވޮލެސްއާއި ޖޯންސަން، މި ޖަރީމާގައި ބައިވެރިވާ މިންވަރު އެނގިގެންދާނެ އެވެ.
މި ފައިލްތައް ވަނީ އެމެރިކާގެ ގައުމީ އަރުޝީފް ގައި ބަހައްޓާފައެވެ.
އެ ފައިލްތައް ސިއްރުކޮށްފައި ވަނީ، އޭގައި ނަން ގަނެވިގެންވާ އެއްވެސް މީހަކު ދިރިހުއްޓައި އެފައިލްތައް ހާމަ ނުކުރާ ގޮތަށް، ރިއާސީ ގަރާރަކުންނެވެ. އެ ފައިލްތަކާ މެދު އެމެރިކާގެ ޖާސޫސީ އިދާރާތަކުން ފާރަވެރި ވެއެވެ. އަޑީ ދައުލަތެވެ!
ޓްރަމްޕަކީ، އެމެރިކާގެ އަޑީ ދައުލަތާ ދެކޮޅަށް ވާހަކަ ދައްކަވާ ބޭފުޅެކެވެ. އަދި ޓްރަމްޕަކީ، ސިޔާސީ ފިކުރުގައި ދީނީ ހަރުކަށި، ކަނާތުފިޔައިގެ ސިޔާސަތުގެ ބޭފުޅެކެވެ.
އެހެންވެ، ވޮޝިންޓަންގައި ބަސްކިޔޭ މިނިވަން ފިކުރުގެ މީހުންނަށް ޓްރަމްޕްގެ ސިޔާސަތަށް ޖާދަ ދޭން އުދަގޫ ވެއެވެ.
ޓްރަމްޕް ސިޔާސީ މައިދާނަށް ނިކުންނެވި ފަހުން އޭނާ އަވަހާރަކޮށްލަން 4 ހަމަލައެއް ދީފައި ވެއެވެ. ފުރަތަމަ ދެ ޙަމަލާ ދީފައިވަނީ 2016 އަދި 2017ގައެވެ. އެއް ހަމަލާގައި ފުލުހެއްގެ ފިސްލޯ ދަމަގަނެގެން މީހަކު ހަމަލަ ދޭން އުޅުނެވެ. އެމީހާ މަރުވީއެވެ. ދެވަނަ ހަމަލާގައި ޓްރަމްޕްގެ ކާރަށް ފޯކުލިފްޓެއް ވައްދާލަން އުޅުނެވެ. އެމީހާއަށް ވީގޮތެއް ނޭނގެއެވެ.
ޓްރަމްޕް ޒަޚަމްކޮށްލި އެންމެ ޝައްކު ބޮޑު ހަމަލައަކީ، ކެމްޕޭން އެއްވުމެއްގައި ޕެންސެލްވީނިއާގައި، މިދިޔަ ޖުލައި މަހު އޭނާގެ ކަންފަތުގެ ފޫޅަށް އަމާޒު ކުރި ހަމަލައެވެ.
އުމުރުން 20 އަހަރުގެ ތޯމަސް މެތިއު ކްރޫކްސް ނަމަކަށް ކިޔާ މީހާ އުސް އިމާރާތަކުން އަމާޒަށް ބެޑިޖެހި ކަމަށް ވެއެވެ. ޓްރަމްޕްގެ ސަލާމަތާ ހަވާލުވެ ތިބި މީހުން ވަނީ، ބަޑި ޖަހައި ކުރޫކްސް މަރާލާފައެވެ.
އެމެރިކާގެ އަޑީ ދައުލަތުން ބުނީ، އެއީ، އީރާނުގެ ޖެނެރަލް ޤާސިމް ސުލައިމާނީ އަވަހާރަކޮށްލުމާ ގުޅިގެން އީރާނުން ކުއްޔަށް ހިފި ގާތިލެއް ކަމަށެވެ. ނަމަވެސް އެއްވެސް ތަހުގީގަކުން އީރާނާ އެމީހާއާ ގުޅުވާލެވޭ ވަރުގެ ކަމެއް ފާހަގައެއް ނުވިއެވެ.
އެއަށްފަހު، މި ޖަނަވަރީގެ 1 ވަނަ ދުވަހު، ޓްރަމްޕާއި އޭނާގެ ރަހުމަތްތެރި ސާދާގަރު މަސްކަށް ޚާއްސަ މެސެޖެއް ދެވުނެވެ.
ލަސްވެގަސްގައި ޓްރަމްޕް އިންޓަނޭޝަނަލް ހޮޓެލަށް ހަމަލަ ދިނީ މަސްކުގެ ކުންފުނިން އުފައްދާފައިވާ ޓެސްލާ ޕިކަޕަކުންނެވެ.
މިހާދިސާގައި ޑްރައިވަރުގެ ނަމަށް ސަމާލުކަން ދީފައެއް ނުވެއެވެ. އެކަމަކު ހަމަލަ ދޭން ބޭނުންކުރި ޕިކަޕްގައި، ހުރީ ހަވާއަރުވަން ބޭނުން ކުރާ ސާމާނާއި ސްޕްރޭ ދަވާދު ފުޅިއެއް ވަރުގެ ގޭސް ފުޅިއެއް ކަމަށް އިއުލާން ކުރިއެވެ. ބަޔަކު ދޭން ބޭނުންވި މެސެޖެކެވެ. ޕިކަޕް ދުއްވި މީހާ ވަނީ މަރާލާފައެވެ.
ޖަނަވަރީ 1 ގައި ދިމާވި މިހާދިސާގެ 14 ފަހުން މީސްމީޑިއާއަށް ފާއްދާލާފައި ވަނީ ކެނެޑީ އަވަހާރަކޮށްލި ހާދިސާގެ ޓޭޕެވެ. ކެނެޑީ އަވަހާރަކޮށްލީ ލިންޑަން ޖޯންސަން ކަމަށް ބުނާ އޯޑިއޯ ޓޭޕެވެ.
