ހަމާސްގެ އިސް އޮފިޝަލަކު ވިދާޅުވާ ގޮތުގައި އިޒްރޭލުން ހަނގުރާމަ ހުއްޓާލައި، ވަގަށް ނަގާފައިވާ ފަލަސްޠީނު މީހުންގެ މުގާބިލުގައި، ހަނގުރާމައިގެ ޒަޔަނިސްޓު އަސީރުން ބަދަލު ކުރުމަށް އެއްބަސްވީ ނަތަންޔާހޫއަށް މުންތަޚަބް ރައީސް ޓްރަމްޕް ފިއްތުމުންނެވެ.
އަލްއަރަބިޔާއަށް މައުލޫމާތު ދެއްވަމުން ހަމާސްގެ ކުރީގެ ހެލްތު މިނިސްޓަރު ބާސިމް ނަޢީމް ވިދާޅުވީ ޑޮނަލްޑް ޓްރަމްޕާ ނުލައި ނަމަ ޣައްޒާގެ ހަނގުރާމަ ހުއްޓާލުމުގެ އެއްބަސްވުން ކުރިއަށް ނުދިޔައީސް ކަމަށެވެ.
ޤަތަރުގެ ބޮޑު ވަޒީރާ ހަވާލާދީ އިޒްރޭލު މިޑިއާއިން މިއަދު ރިޕޯޓުކޮށްފައި ވަނީ 7 ގަޑިއިރުގެ ސައްލާއަކަށް ފަހު އިޒްރޭލު ކެބިނެޓުން ރޭ، އޯކޭ ކޮށްފައިވާ އެއްބަސްވުމަކީ 2023ގެ ޑިސެމްބަރު މަހު މަޝްވަރާ ކޮށް ބަހުސް ކުރެވުނު އެއްބަސްވުމެވެ. ފަހުން ނަތަންޔާހޫ ވަނީ އެއިރު، އެ އެއްބަސްވުން ބޮލާލައި ޖަހާފައެވެ.
ޓްރަމްޕްގެ ފަރާތުން ނަތަންޔާހޫއަށް މި އެއްބަސްވުމުގައި ސޮއި ކުރުމަށް މަޖުބޫރު ކުރުވީ ޓްރަމްޕްގެ މެދުއިރުމަތީގެ މައްސަލަތަކާ ބެހޭ މަންދޫބެވެ.
ނިއުޔޯކުގެ ރިއަލް އެސްޓޭޓް ޑިވެލޮޕަރެއް ކަމަށްވާ ސްޓީވް ވިޓްކޯފަކީ ޑިޕްލޮމެސީގެ ތަޖުރިބާ ހުރި މީހެއް ނޫނެވެ. ނަމަވެސް އަތްކަށި އަނބުރަން ދަންނަ މީހެކެވެ.
މިދިޔަ ހޮނިހިރު ދުވަހު އޭނާ ނަތަންޔާހޫއާ ބައްދަލު ކުރި އިރު ދިން މެސެޖު ވަރަށް ސާފެވެ. އޭނާ ބުނެފައި ވަނީ މިހާތަނަށް ޓްރަމްޕް، އިޒްރޭލަށް ސަޕޯޓުކޮށްފައިވާ ކަމަށާއި މިހާރު ޓްރަމްޕަށް ސަޕޯޓު ދޭން ޖެހޭ ވަގުތު އައިސް ޖެހިއްޖެ ކަމަށެވެ. އެހެންވެ، ސުލްހައިގެ އެއްބަސްވުމުގައި ސޮއި ކުރުން ނޫން ގޮތެއް ނަތަންޔާހޫއަށް ނެތް ކަމަށެވެ.
"އެއްބަސްވުމުގައި ސޮއި ނު ކުރުކާނަމަ، އެންމެން ފޮށި ބަނދެގެން ގެއަށް ކަނޑާލަންވީ" ނަތަންޔާހުއާ ދިމާއަށް ވިޓްކޮފް ބުނިކަމަށް ވޯލްސްޓްރީޓް ޖާނަލްއިން ރިޕޯޓުކޮށްފައި ވެއެވެ.
ޤަތަރުގައި މަޝްވަރާ ކުރިއަށް ދިޔައީ އެއް އިމާރާތެއްގެ އެއް ފަޅިއެއްގައި ތަފާތު ދެ ފަންގިފިލާގައި ހަމާސްއާއި އިޒްރޭލު ވަފްދު ބައިތިއްބައިގެންނެވެ.
ވިޓްކޮފް ގެންގުޅުނީ ކުރީގެ މަޝްވަރާތަކުގެ ލިޔުންތައް ހުރި ބޯ ފައިލެކެވެ. ޤަތަރާއި މިސްރުން ދެ ފަރާތާ ވާހަކަ ދެއްކުމަށް ފަހު އެއްބަޔަކު އަނެއް ބަޔަކު ބުނާ އެއްޗެއް އަނެއް ފަރާތަށް ނަގުލު ކޮށްދެމުން ދިޔައެވެ.
މި ވާހަކަތަކުގައި ހަމާސް ފެނިގެން ގޮސްފައި ވަނީ މީގެ ކުރިން ފަލަސްޠީނުން ބޭއްވި މަޝްވަރާތަކުގައި، (އޮސްލޯ 1 އަދި 2 މުއާހަދާގެ މަޝްވަރާގައި) ޕީއެލްއޯ/ފަތަޙަ ޖަމާއަތުން ފެނިފައި ނުވާފަދަ ހުނަރު ވެރި ބަޔެއްގެ ގޮތުގައެވެ.
އިޒްރޭލު މީޑިއާއިން ހަމާސްގެ މަސައްކަތަށް ތައުރީފު ކޮށް ބުނެފައި ވަނީ، ހަމާސްއިން، އެއްބަސްވުމުގެ ކޮންމެ ޖުމުލައެއްގެ ކޮންމެ ބަހަކާއި، ޖުމުލަ އަތުރާފައިވާ ގޮތާއި، ކޮމާ ޖަހާފައިވާ ތަންތަން ފުރިހަމައަށް ބަލައި، އޯކޭ ކުރި ކަމަށެވެ.
މިވާހަކަ އިތުރަށް ސާބިތުކޮށް ދެނީ އަލްއަރަބީ އަލްޖަދީދުގެ ރިޕޯޓަކުންނެވެ. އޭގައި ހަމާސްގެ މަސްއޫލުވެރިއަކާ ހަވާލާދީ ބުނެފައި ވަނީ މި އެއްބަސްވުމުގެ މައިގަނޑަށް ބަދަލުތައް ގެނަސް މިހާރު އޮތް ގޮތަށް ޑްރާފްޓް ކުރީ ޙަމާސްއިން ކަމަށެވެ.
ހަމާސްއިން ބޭނުންވީ ނަތަންޔާހޫގެ ކެބިނެޓްގައި ހިމެނޭ ހައްދުފަހަނައަޅާފައިވާ ހަރުކަށި މީހުންނަށް، ނޫނެކޭ ނުބުނެވޭ ވަރުގެ އެއްބަސްވުމެއް ހުށަހަޅާށެވެ.
ޣައްޒާގެ ހަނގުރާމަ ހުއްޓާލުމުގައި، މުއްދަތު ހަމަވެފައިވާ ފަލަސްޠީނުގެ މަހުމޫދު އައްބާސްގެ ސަރުކާރަށް އެއްވެސް ދައުރެއް ނުވެއެވެ. އަދި މީޑިއާގައި އައްބާހުގެ އައުވާނުން ވަނީ މި އެއްބަސްވުމާއި ޙަމާސްއާ ދެކޮޅަށް ވާހަކަ ދައްކާފައެވެ.
