ކިއުބާއާއެކު ޑިޕްލޮމެޓިކް ގުޅުންތައް ގާއިމްކުރިތާ ގާތްގަނޑަކަށް އަހަރެއްހާ ދުވަސް ފަހުން ދެކުނު ކޮރެއާއިން މިއަދު ހަވާނާގައި އެމްބަސީ ހުޅުވައިފިއެވެ.
ހަވާނާގެ މިރާމާ ޑިސްޓްރިކްޓްގައި އެމްބަސީ ހުޅުވުމުގެ ރަސްމިއްޔާތުގައި ދެކުނު ކޮރެއާގެ ފޮރިން މިނިސްޓްރީގެ ސެންޓްރަލް އެންޑް ސައުތު އެމެރިކާގެ ކަންކަމުގެ ޑިރެކްޓަރު ޖެނެރަލް ލީ ޖޫ އިލް އާއި ކިއުބާގެ ފޮރިން މިނިސްޓްރީގެ ޑިރެކްޓަރު ޖެނެރަލް ފޯ ބައިލެޓަރަލް އެފެއާޒް ކާލޮސް ޕެރޭރާ ބައިވެރިވެވަޑައިގެންނެވި އެވެ.
ދެކުނު ކޮރެއާއިން ކިއުބާއަށް ސަފީރަކު ވަރަށް އަވަހަށް އައްޔަން ކުރާނެއެވެ.
ކިއުބާއިން ދެކުނު ކޮރެއާއަށް ކަނޑައަޅާފައި ވަނީ ކްލޯޑިއޯ މޮންޒޮން އެވެ. އޭނާގެ މަގާމާ ހަވާލުވެވަޑައިގަތީ މިދިޔަ ހަފްތާގަ އެވެ.
ދެކުނު ކޮރެއާ އާއި ކިއުބާއިން ގުޅުން ގާއިމް ކުރީ މިދިޔަ އަހަރުގެ ފެބްރުއަރީ 14 ވަނަ ދުވަހު އެވެ.
