ރައްޔިތުން ނިކުމުގެ މަގުމަތިން ރައީސުލްޖުމުހޫރިއްޔާ ޑރ މުހައްމަދު މުއިއްޒުގެ ސަރުކާރު ވައްޓާނުލާނެ ކަމަށް، ރައީސް މުއިއްޒު ހީކޮށްގެން ނުވާނެ ކަމަށް ވިދާޅުވެ ކުރީގެ ހޯމް މިނިސްޓަރު އުމަރު ނަސީރު ދެއްކެވި ވާހަކައަށް ނާއިބު ރައީސް ހުސެއިން މުހައްމަދު ލަތީފް ވަރުގަދަ ރައްދެއް ދެއްވައިފިއެވެ.
ޓީވީ ޕްރޮގްރާމެއްގައި ވާހަކަ ދައްކަވަމުން އުމަރު ވަނީ، ދިވެހީންނަކީ ހުކުރުން ފައިބައިގެން ގުޅަކުޅޭ ފަސްގަނޑަށްގޮސް ރަސްގެފާނު ބަދަލުކުރާ ބައެއް ކަމަށް ވިދާޅުވެ، އެގޮތަށް ރައީސް ޑރ މުއިއްޒު ގެ ވެރިކަން ވެސް މަގުމަތިން ވައްޓާލާން ޖެހިއްޖެނަމަ އެކަން އެގޮތަށް ކުރާނެ ކަމުގެ އިންޒާރު ދެއްވާފައެެވެ.
މިކަމާގުޅިގެން ލިޔެފައިވާ ހަބަރެއް 'އެކްސް' ގައި ރީޕޯސްޓު ކުރައްވާ ނައިބު ރައީސް ވިދާޅުވީ ރައީސް ޑރ. މުއިއްޒަކީ އަބަދުވެސް ބިނާކުރަނިވި ފާޑުކިޔުމަށް ޖާގަދެއްވާ ބޭފުޅެއް ކަމަށާއި އެއީ ގައުމަށް އަދި ރައްޔިތުންނަށް ހިދުމަތެއް ކޮށްދެއްވަން ނުކުމެވަޑައިގަންނަވާ ކޮންމެ ވެރިއެއް ނުވަތަ ސިޔާސީ ބޭފުޅެއްގެ ކިބައިގައި ހުންނަން ވާނެ ސިފައެއް ކަމަށެވެ.
އަދި ފާޑުކިޔުމުގެ ނަމުގައި ދިވެހި ރައްޔިތުންނަކީ ނާތަހުޒީބު، ޑިމޮކްރެސީ އާއި ދުރުބައެއް ކަމަށްބުނެ، ރައްޔިތުންނަށް ހަޖޫޖެހުމަކީ ދަށުދަރަޖައިގެ އަމަލެއްކަމަށް އެމަނިކުފާނު ވަނީ ވިދާޅުވެފައެވެ.
