އާޓިފިޝަލް ބީޗް ސަރަހައްދުގައި ހުކުރު ދުވަހުގެ ރޭ ހިންގި ހަމަނުޖެހުންތަކުގައި ފުލުހުންގެ ބެލުމުގެ ދަށަށް ގެންދިޔަ 3 ބިދޭސިޔަކު ޑީޕޯޓްކުރުމަށް މަސައްކަތް އިމިގްރޭޝަނުން ފަށައިފިއެވެ.
މިކަމާ ގުޅިގެން ރޭ، ކޮންޓްރޯލަރ އޮފް އިމިގްރޭޝަން މުހައްމަދު ޝައްމާން ވަހީދު ވިދާޅުވީ މި ހަމަނުޖެހުމާއި ގުޅިގެން ފުލުހުން 3 ބިދޭސިޔަކު އިމިގްރޭޝަނާ ހަވާލުކޮށްފައިވާ ކަމަށެވެ. އަދި މިއެންމެން ޑިޕޯޓް ކުރުމުގެ މަސައްކަތް ފަށާފައިވާކަމަށް ކޮންޓްރޯލަރ އޮފް އިމިގްރޭޝަން ޝައްމާން ވިދާޅުވިއެވެ. އެކަމަކު ބިދޭސީ 3 މީހުން ނިސްބަތްވާ ގައުމު ހާމަކޮށްފައެއް ނުވެއެވެ.
މަންޒަރު ދުށް ފަރާތްތަކުން މައުލޫމާތު ދިން ގޮތުގައި ހުކުރު ދުވަހުގެ ރޭ އާޓިފިޝަލް ބީޗުގައި ހަމަނުޖެހުން ހިންގީ އިންޑިޔާއަށް ނިސްބަތްވާ ބައެކެވެ.
އާޓިފިޝަލް ބީޗް ސަރަހައްދަކީ މާލޭގައި ދިރިއުޅޭ ގިނަ އަދަދެއްގެ ދިވެހިންނާއި ބިދޭސީން ބަންދު ދުވަސްތަކުގައި ހިތްއުފާކޮށްލުމަށް ގޮސް އުޅޭ ސަރަހައްދެކެވެ. އެކަމަކު މިފަހަރުން މިސަރަހައްދުގައި ބިދޭސީން މާރާމާރީ ހިންގާ މައްސަލަ ވަނީ ބޮޑުވެފައެވެ.
