ތާވަލުގެ ކުރީގައި އޮތް އެތުލެޓިކޯ މެޑްރިޑާ ކައިރިއަށް ޖެހިލުމަށް މަޝްހޫރު ބާސެލޯނާއަށް ލިބުނު ފުރުސަތަށް ގެޓާފޭއިން ރޭ ހުރަސްއަޅައި ލަނޑުދީފިއެވެ.
ގެޓާފޭގެ ދަނޑުގައި ކުޅުނު މިމެޗު އެޓީމުން ވަނީ 1-1 އިން ބާސެލޯނާއާ އެއްވަރުކޮށް، ރެލިގޭޝަން ޒޯނުން މައްޗަށް ޖެހިލާފައެވެ.
އެންމެ ފަހުން ކުޅުނު 2 މެޗުގައި 10 ކާމިޔާބުކޮށްފައިވާ ބާސެލޯނާއިން މިމެޗުގައި ގެޓާފޭގެ ގޯލު ހުޅުވާލީ މެޗުގެ 10 ވަނަ މިނެޓުގައެވެ. މި ލަނޑު ކާމިޔާބު ކޮށްދިނީ ފްރާންސްގެ ޑިފެންޑަރު ޖޫލްސް ކުންޑޭއެވެ. އެކަމަކު ފުރަތަމަ ހާފް ނިމެން ދިހަ ވަރަކަށް މިނެޓަށްވެފައި ވަނިކޮށް ގެޓާފޭގެ މައުރޯ އަރަމްބައްރީ ލަނޑެއް ޖަހައި ނަތީޖާ ހަމަހަމަކުރީއެވެ.
މިމެޗުގައި ގިނަަ ވަގުތު ބޯޅަ ހިފަހައްޓައި، 21 ހަމަލާ ބާސެލޯނާއިން އުފެއްދިއެވެ. ކައުންޓައެޓޭކުގައި ގެޓާފޭއިން 10 ހަމަލާ އުފެއްދިއެވެ. ސްޕެނިޝް ލަލީގާގައި ބާސެލޯނާ އެންމެފަހުން ކުޅުނު 8 މެޗުގެ ތެރެއިން މޮޅުވެވިފައި ވަނީ އެންމެ މެޗަކުންނެވެ.
ތާވަލުގެ 3 ވަނައިގައި ބާސެލޯނާ އޮތީ 39 ޕޮއިންޓާއެކުއެވެ. ދެވަނައިގައި ވާދަވެރި ރެއާލްމެޑްރިޑް އޮތީ 43 ޕޮއިންޓާއެކުއެވެ. އެއްވަނައިގައި އެތުލެޓިކޯ މެޑްރިޑް އޮތީ 44 ޕޮއިންޓާއެކުއެވެ. އެކަމަކު އަމިއްލަ ދަނޑުގައި މިރޭ ލަސް ޕަލްމަސް އަތުން ރެއާލް މޮޅުވެއްޖެނަމަ ރެއާލްއަށް ތާވަލުގެ ކުރިއަށް ޖެހިލެވޭނެއެވެ.
