ވިޔަފާރިވެރިން ހޭލުންތެރިކުރުމަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ފ. ފީއަލީގެ ފިހާރަތަކަށް ޒިޔާރަތްކޮށް މައުލޫމާތުދިނުމުގެ ޕްރޮގްރާމެއް އެ ރަށު ޕޮލިސް ޕޯސްޓުން ހިންގައިފިއެވެ.
އިއްޔެ ހިންގި މި ޕްރޮގްރާމުގައި، ދުންފަތް ކޮންޓްރޯލް ކުރުމާބެހޭ ގާނޫނަށް މިހާރު އައިސްފައިވާ ބަދަލުތަކާ ގުޅޭގޮތުން މައުލޫމާތުދީ އެ ގާނޫނާ އެއްގޮތަށް އަމަލުކުރުމަށް އިލްތިމާސްކޮށްފައިވެއެވެ. އަދި މަކަރާއި ހީލަތުން ފައިސާގެ މުއާމަލާތް ކުރަމުންދާ މައްސަލަތަކުން ރައްކާތެރިކުރުމަށް މައުލޫމާތުދީފައިވާ ކަމަށްވެސް ފުލުހުން ބުނެފައިވެއެވެ.
އެގޮތުން ބެންކް އޮފް މޯލްޑިވްސްގެ އެކައުންޓުތަކުން ކުރަމުންގެންދާ ޓްރާންސްފަރއާ ގުޅޭގޮތުން މިހާރަށްވުރެ ބޮޑަށް ސަމާލުކަންދިނުމަށާއި، ވައްކަމާއި ސްކޭމް ފަދަ ކުށްތަކުން ރައްކާތެރިވުމަށް ކުރެވިދާނެ ކަންކަމާއި ވިޔަފާރިއާ ގުޅުންހުރި އެހެނިހެން ކަންކަމާ ގުޅޭގޮތުން ވެސް އިރުޝާދުދީ މައުލޫމާތުދީފައިވެއެވެ.
ކުށްމަދު އަމާން މުޖުތަމައެއް ގާއިމުކޮށް، ރައްޔިތުން ހޭލުންތެރިކުރުމަށް ސިލްސިލާކޮށް މިފަދަ ޕްރޮގްރާމްތައް ފުލުހުން ގެންދަނީ ހިންގަމުންނެވެ.
