މިއަހަރު ފެށުނު ފަހުން ރާއްޖޭގެ ޓުއަރިޒަމް %9.7 ގައި ކުރިއަރަމުންދާކަން ތަފާސް ހިސާބުތަކުން ދައްކައިފިއެވެ.
ޓުއަރިޒަމް މިނިސްޓްރީއިން އާންމުކޮށްފައިވާ ތަފާސް ހިސާބަށް ބަލާއިރު މިއަހަރުގެ ފުރަތަމަ 18 ދުވަހު ރާއްޖެއަށް 117،532 ފަތުރުވެރިން ރާއްޖެއަށް ވަނީ ޒިޔާރަތްކޮށްފައެވެ. އެއީ މިދިޔަ އަހަރުގެ މި މުއްދަތާ އަޅާބަލާއިރު %9.7 ކުރިއެރުމެކެވެ.
ތަފާސް ހިސާބުތަކުންް ދައްކާ ގޮތުން މިއަހަރު ފެށުނު ފަހުން ކޮންމެ ދުވަހަކު އެވްރެޖުކޮށް 6،530 ފަތުރުވެރިން ރާއްޖެ ޒިޔާރަތް ކުރެއެވެ.
މިއަހަރު އެންމެއިން ރާއްޖެއަށް ފަތުރުވެރިން ޒިޔާރަތް ކުރަމުން ދަނީ ރަޝިޔާއިންނެވެ. އެއަށްފަހު އިޓަލީ، ޗައިނާ، އިނގިރޭސިވިލާތް އަދި ޖަރުމަނުގެ ފަތުރުވެރިންނެވެ.
މިދިޔަ އަހަރު ރާއްޖެއަށް 2 މިލިޔަން ފަތުރުވެރިން ޒިޔާރަތް ކުރިއެވެ. މިއަހަރު ހުޅުލޭ އެއަރޕޯޓުގެ އައު ޓާމިނަލް ހުޅުވަން މަސައްކަތް ކުރަމުންްދާއިރު، މި ޓާމިނަލް ހުޅުވުމާއެކު ފަތުރުވެރިން އަންނަ އަދަދު އިތުރުވެގެންދާނެ ކަމަށް ފަތުރުވެރިކަމުގެ ދާއިރާގެ ތަޖުރިބާކާރުން ލަފާ ކުރައްވައެވެ.
