ޖަރުމަނުގައި ރާއްޖޭގެ ޓުއަރިޒަމް އިސްތިހާރު ކުރުމަށް، އެގައުމުގެ ޓެކްސީތަކުގައި ރާއްޖޭގެ ހިތްގައިމު މަންޒަރުތައް ދައްކުވައިދޭ ފޮޓޯ ޖެހުމަށް މޯލްޑިވްސް މާކެޓިންގް ޕަބްލިކް ރިލޭޝަންސް ކޯޕަރޭޝަން، (އެމްއެމްސީ) އިން ނިންމައި އެކަމުގެ ތައްޔާރީތައް ވާން ފަށައިފިއެވެ.
ރާއްޖެ ޕްރޮމޯޓް ކުރުމުގެ މި ކެމްޕެއިން ކުރިއަށް ގެންދިޔުމަށް ހަމަޖެހިފައިވާ ދުނިޔޭގައި ބާއްވާ އެންމެ ބޮޑު ޓުއަރިޒަމް ފެއާ، އައިޓީބީއާ ދިމާކޮށް ފެބްރުއަރީ 7 އިން މާރިޗު މަހުގެ 13 ވަނަ ދުވަހުގެ ނިޔަލަށެވެ.
މި ކެމްޕެއިނުގައި ޖަރުމަނުގެ ވެރިރަށް ބާލިންގެ 200 ޓެކްސީއެއްގައި ރާއްޖޭގެ ޤުދުރަތީ ރީތި މަންޒަރު ފެންނަ ގޮތްދަހާނެއެވެ. އަދި މި ކެމްޕެއިންގައި ޖަރުމަން މާކެޓުގައި ރާއްޖެއަކީ ޕްރިމިއާ ޓްރެވަލް މަންޒިލެއްގެ ގޮތުގައި ފެނިގެންދާނެ އެވެ.
މި ކެމްޕެއިންގެ އިތުރަށް، އައިޓީބީ ބާލިންގައި އެކިއެކި ހަރަކާތްތަކުގެ ތެރެއިން، އެމްއެމްޕީއާރުސީއިން ޓްރެވަލް ޓްރޭޑާއި މީޑިއާއާ ގުޅިގެން މަސައްކަތް ކުރާނެ އެވެ. މީގެ ތެރޭގައި ސިނާއަތާ ގުޅޭ މައުޟޫއުތަކުގައި ސެމިނާތަކާއި ޕެނަލް ޑިސްކަޝަންތަކުގެ އިތުރުން މީޑިއާ އާއި ނޫސްވެރިންނަށް ހާއްސަ އިވެންޓެއް ކަމަށްވާ އައިއެމްއެމް ޖަރުމަނުގައި ބައިވެރިވުން ހިމެނެ އެވެ.
ޖަރުމަންވިލާތުގެ ފަތުރުވެރިން މެދުގައި ރާއްޖެއަކީ މަގުބޫލު މަންޒިލެކެވެ. މިއަހަރުގެ މިހާތަނަށް ޖަރުމަނުން ރާއްޖެއަށް 7313 ފަތުރުވެރިން އައިސްފައެވެ.
