އިޒްރޭލްގެ ސިފައިން ވަނީ، ހިފާފައިވާ ހުޅަނގު އައްސޭރީގެ ޤަލްޤީލިޔާ ކައިރީގައި އޮންނަ އައްޒޫން ޓައުން އަށް ދިން ޙަމަލާއެއްގައި ފަލަސްތީނުގެ އެތައް ބަޔަކު ހައްޔަރުކޮށްފައެވެ. ހުޅަނގު އައްސޭރީގައި ޒަޔަނިސްޓުންގެ އޮޕަރޭޝަން ވަރުގަދަ ކޮށްފައި ވަނީ، ޣައްޒާގައި ހަނގުރާމަ ހުއްޓާލުމާއި ގައިދީން ބަދަލުކުރުމުގެ އެއްބަސްވުމާ ގުޅިގެން އިޒްރޭލް ސިފައިން ގައްޒާއިން ބޭލުމާ ގުޅިގެންނެވެ.
އިޒްރޭލުގެ ޗީފް އޮފް ސްޓާފް ލެފްޓިނެންޓް ޖެނެރަލް ހެރްޒީ ހަލެވީ ވަނީ، "ކުރިއަށް އޮތް ދުވަސްތަކުގައި ހުޅަނގު އައްސޭރީގައި މުހިންމު އޮޕަރޭޝަންތަކެއް އިޒްރޭލު ސިފައިން ހިންގުމަށް ތައްޔާރުވާން ޖެހޭނެ" ކަމަށާއި ފަލަސްޠީނު މީހުން ކޮންޓްރޯލު ކުރަން ޖެހޭނެ ކަމަށް އަންގާފައެވެ.
އިޒްރޭލްގެ އެހެން އޮފިޝަލުން ވެސް ވަނީ ކުރިއަށް އޮތް ދުވަސްތަކާއި ހަފްތާތަކުގައި ހުޅަނގު އައްސޭރީގެ އެކި ހިސާބުތަކުގައި އޮޕަރޭޝަންތައް އިތުރަށް ވަރުގަދަ ކުރަން ރާވާފައިވާ ކަމަށް އިޝާރާތްކޮށްފަ އެވެ.
މިއަދު އިޒްރޭލް ސިފައިން ވަނީ މުޅި ހުޅަނގު އައްސޭރީގައި ހުރި ގިނަ އަދަދެއްގެ ޗެކްޕޮއިންޓްތަކާއި ގޭޓްތަކާއި ފަލަސްޠީނު މީހުން ހިނގަން ޚާއްސަކޮށްފައި އޮންނަ މަގުތައް ބަންދުކޮށްފަ އެވެ.
ފަލަސްތީނުގެ ނޫސްތަކުން ރިޕޯޓްކޮށްފައިވާ ގޮތުގައި މި ސަރަހައްދުގެ ހުރިހާ ސިޓީއެއް ވެސް ވަނީ އެއްބަޔަކު އަނެއް ބަޔަކާ ދެމދު ގުޅުމެއް ނެތް ގޮތަށް ވަކިކޮށްފައެވެ.
ރާމަﷲއާއި ޚަލީލާއި ޤަލްޤީލިއާއާއި ސަލްފިޓް އަދި ޤުދުސްއަށް ވަދެވެން އޮންނަ ހުރިހައި މަގެއް ވަނީ ބަންދުކޮށްފައެވެ.
