ބަންޑްރާގައި ހުންނަ ސައިފް ޢަލީ ޚާންގެ ގޭގައި ވައްކަން ކުރަން އުޅުނު މީހަކު އޭނާއަށް ހަމަލާދިނުމާ ގުޅިގެން، އޭނާގެ އާއިލާއާއެކު ކަރީނާ ކަޕޫރު ޚާން ގިނަ އަދަދެއްގެ ސެކިއުރިޓީ ބަލަހައްޓާ މީހުންނާއެކު މުމްބާއިން ފެންނަމުންދާކަމަށް ރިޕޯޓްތަކުންބުނެއެވެ.
މީގެ އިތުރުން ބަންޑްރާގައި ހުރި ސައިފްގެ ޕަޓައުދީ ގޭގައި އިތުރު ސީސީޓީވީ ކެމެރާތައް ހަރުކުރަމުންދާ މަންޒަރު ދައްކުވައިދޭ ބައެއް ވީޑިއޯތައް އޮންލައިންކޮށް ފެތުރިފައިވެއެވެ. ސައިފް ލީލާވަތީ ހޮސްޕިޓަލުގައި ސަރޖަރީއެއް ހަދާ، މިހާރު ހާލަތު ރަނގަޅުވަމުންދާއިރު، ބޮލީވުޑްގެ މަޝްހޫރު ތަރިންނަށް ދެވޭ ހަމަލާތައް އިތުރުވަމުންދާތީ، ސަލާމަތާއި ރައްކާތެރިކަމާ ބެހޭގޮތުން ކަންބޮޑުވުންތައް އުފެދެމުންދެއެވެ.
މި މައްސަލައިގައި މުހައްމަދު ޝަރީފުލް އިސްލާމް ޝެހްޒާދު ނަމަކަށް ކިޔާ ބަންގްލަދޭޝްގެ ރައްޔިތެއް ފިލަން މަސައްކަތްކުރަނިކޮށް ތާނޭގައި ވަނީ ހައްޔަރުކޮށްފައިއެވެ. މި ހާދިސާ ހިނގާފައިވަނީ ޖަނަވަރީ 16 ވަނަ ދުވަހުގެ ފަތިހު ސައިފްގެ ބަންޑްރާގައި ހުރި ގެއަށް، މި މީހާ ވައްކަން ކުރުމުގެ ނިޔަތުގައި ވަދެގެންނެވެ. ސައިފް ޒަޚަމްވެފައިވަނީ އޭނާގެ ގޭތެރޭގެ މަސައްކަތު މީހާ ސަލާމަތްކުރަން މަސައްކަތްކުރަނިކޮށެވެ.
އިންޑިއާގެ މަޝްހޫރު މި އެކްޓަރު ވަރަށް އަވަހަށް ހޮސްޕިޓަލުން ދޫކޮށްލެވޭނެ ކަމަށް ރިޕޯޓުތަކުން ދަނީ ބުނަމުންނެވެ.
