މާޅޮސްމަޑުލު އުތުރުބުރީ އުނގޫފާރު ސުކޫލަށް ދިމާވެފައިވާ ޖާގާއިގެ ދަތިކަން ހައްލުކޮށްދިނުމަށް އެ ރަށު ކައުންސިލުން އެދެފިއެވެ.
އެ ރަށު ކައުންސިލުން މި ކަމަށް އެދިފައިވަނީ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، މާޅޮސްމަޑުލު އުތުރުބުރީ އުނގޫފާރު ކައުންސިލާއި، އަންހެނުންގެ ތަރައްގީއަށް މަސައްކަތްކުރާ (އ.ތ.މ.) ކޮމިޓީއާއި އެރަށުގެ މުއައްސަސާތަކުގެ އިސްވެރިންނާއި ބައްދަލުކުރައްވައި ރައްޔިތުން ބޭނުންވާ ކަންކަމާއި ރައްޔިތުންގެ ކަންބޮޑުވުންތަކާ ގުޅޭގޮތުން ބޭއްވި މަޝްވަރާކުރެއްވުމުގައެވެ.
މި ބައްދަލުކުރެއްވުން ކުރިއަށްދިޔައީ އިއްޔެ މާޅޮސްމަޑުލު އުތުރުބުރީ އަތޮޅު ކައުންސިލް އިދާރާގައެވެ.
މި ބައްދަލުކުރެއްވުމުގައި ކައުންސިލުން ވަނީ މިހާރު އުނގޫފާރުގައި ހިނގަމުންދާ މަޝްރޫޢުތައްް ފުރިހަމަކޮށްދެއްވައި، އާ މަޝްރޫޢުތައް ފަށްޓަވައިދެއްވުމަށް އެދިވަޑައިގެންފައެވެ. މިގޮތުން ރަށުގައި ބޯހިޔާވަހިކަމުގެ މަޝްރޫއެއް ފައްޓަވައި ދެއްވައި، ރަށު ސުކޫލަށް ދިމާވެފައިވާ ޖާގާއިގެ ދަތިކަން ހައްލުކޮށްދެއްވުމަށާއި، އިތުރު ކުލާސް ރޫމްތަކެއް އެޅުމުގެ މުހިންމުކަން ކައުންސިލުން ފާހަގަކުރެވިއެވެ. އަދި ރައީސްގެ ވައުދުފުޅާ އެއްގޮތަށް އާރބަން ސެންޓަރެއްގެ ގޮތުގައި ރަށް ތަރައްގީވެގެން އަންނައިރު، ވިޔަފާރި ބަނދަރެއް ރަށުގައި އޮތުމުގެ މުހިންމު ކަންވެސް ކައުންސިލުން ފާހަގަކުރެއްވިއެވެ. މީގެ އިތުރުން ގައުމީ ޔުނިވަރސިޓީގެ ކެންޕަހަކާއި، ޓިވެޓް ސެެންޓެރަކާއި، ސަރުކާރުގެ މުއަަައްސަސާތައް އެއްފުރާޅެެއްގެ ދަށުން ހިދުމަތް ދެވޭނެ އިމާރާތެއްގެ ބޭނުންތެރިކަންވެސް ކައުންސިލުން ފާހަގަ ކުރެއްވިއެވެ.
މި ބައްދަލުކުރެއްވުމުގައި ރައީސް ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވާނެކަމުގައެވެ. އަދި އެމަނިކުފާނު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެ ފަހުގެ މަޢުލޫމާތު ޙިއްޞާކުރައްވާފައެވެ.
