ސެންޓްރަލް އޭޝިއަން ވޮލީބޯލް އެސޯސިއޭޝަންސް (ކާވާ) ބީޗު ވޮލީބޯލް ޗެމްޕިއަންޝިޕުގައި ވާދަކުރާ ރާއްޖޭގެ އަންހެން އަދި ފިރިހެން ގައުމީ ބީޗުވޮލީ ޓީމު ސްރީ ލަންކާއަށް މިއަދު ފުރައިފިއެވެ.
މުބާރާތް ކުރިއަށްދާނީ ކުރިއަށް އޮތް ހުކުރުދުވަހުން ފެށިގެން އާދީއްތަ ދުވަހުގެ ނިޔަލަށް ނިގަމްބޯގައެވެ.
މި މުބާރާތުގައި ރާއްޖޭގެ ހަތަރު ޕެއާއެއް ވާދަކުރާނެއެވެ. އެއީ އަންހެން ދެ ޕެއާ އާއި ފިރިހެން ދެ ޕެއާއެވެ.
މުބާރާތުގައި ވާދަކުރާ ރާއްޖޭގެ ފިރިހެން ދެ ޕެއާއަކީ އިސްމާޢީލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް) ގެ ޕެއާ އާއި މުޙައްމަދު އަލީ (ޑެންޒޯ) އާއި އަޙްމަދު މުޙައްމަދު (ކޯކޭ) ގެ ޕެއާއެވެ. އަންހެން ޕެއާގެ ތެރޭގައި ހިމެނެނީ ހައްވާ ރާޝިދާ އާއި އައިޝަތު މާޖިދާގެ ޕެއާއެވެ. އަދި ރާއްޖޭގެ އަންހެން ޗެމްޕިއަން އައިމިނަތު އަރީޝާ އާއި ފާތިމަތު ޒީނިއާގެ ޕެއާވެސް ވާދަކުރާނެއެވެ.
