ފަޅޮލަކީ ދިވެހިރާއްޖޭގެ މާހައުލުގައި ވަރަށް ފަސޭހައިން ހެއްދޭ މޭވާއެކެވެ. މިއީ ހަށިގަނޑަށް ބޭނުންވާ ގިނަ ކާނާގެ މާއްދާތައް ލިބޭ މޭވާއެކެވެ. އަދި ވިޔަފާރީގެ ގޮތުން ދަނޑުވެރިކަން ކުރާ ފަރާތްތަކަށް ރަނގަޅު އާމްދަނީއެއް ލިބޭ އެއް ބާވަތެވެ. ފަޅޯ ގަހަކީ ބެލެހެއްޓުމަށް ފަސޭހަ، އަދި ނިސްބަތުން ބަލިތަކާއި ފަނިފަކުސާގެ ސަބަބުން ލިބޭ ގެއްލުން ކުޑަ ގަހެކެވެ.
ބިން ތައްޔާރު ކުރުން:
ފަޅޯ އިންދުމަށް އެންމެ ރަނގަޅީ ފެން ރަނގަޅަށް ހިނދޭ، ގުދުރަތީ ކާނާ ގިނައިން އެކުލެވޭ ބިމެކެވެ. ދިވެހިރާއްޖޭގައި އާންމުކޮށް ހައްދާ ރެޑް ލޭޑީ ފަޅޮލާއި ހޮލެންޑު ފަޅޯ އިންދަނީ އެއް ދުރުމިނެއްގައެވެ. ދަނޑުގައި ފަޅޯ އިންދަން ފަށަންވަންވާނީ ވަށައިގެންވާ ހޭޅި ގަސްތަކުން 15 ފޫޓު ދުރުންނެވެ. ނުވަތަ ދަނޑުގެ ބޯޑަރު ކޮނެ، މޫތައް ކަނޑާލެވިދާނެއެވެ.
ވަޅު ތައްޔާރު ކުރާނީ 2x2 ފޫޓުގެ ބޮޑުމިނަށެވެ. އަލަށް ފަށާ ބިމެއްނަމަ، 2x2 ފޫޓު އަޑިއަށް ކޮނެ، ބޮޑެތި ގަލާއި ގަސްގަހުގެ މުލާއި ދޮންފަސް ނަގައި ބޭރުކުރަންވާނެއެވެ. ކޮންމެ ވަޅަކަށް 6-8 ކިލޯގެ ކާދު އެއްކުރެވިދާނެއެވެ. ގަސްތައް ހެދެން ފެށުމުން ކޮންމެ 3 މަހަކުން 2-3 ކިލޯގެ ކާދު އެޅިދާނެއެވެ. ދަނޑުގެ ލޭއައުޓް ތައްޔާރު ކުރާއިރު ދެ ގަސް ދޭތެރޭ 8 ފޫޓު އަދި ދެ ބަރި ދޭތެރޭ 10 ފޫޓު ބެހެއްޓުން ރަނގަޅުވާނެއެވެ.
ނާސަރީ ކުރުން:
ފަޅޯ މުޑުވައްކުރުމަށްފަހު ނާސަރީގައި 2-3 މަސް ހޭދަވެއެވެ. މި މަރުޙަލާގައި ގަސް ގެންގުޅޭނީ ނާސަރީ ނެޓު ޖަހައި ހިޔާކޮށްގެންނެވެ. ގަސްތައް ދަނޑަށް ބަދަލުކުރާ ވަރަށް ބޮޑުވުމުން، އަތްވަށް ހާނާލުން މުހިންމެވެ. ކޮންމެ ދުވަހަކު އަވީގައި ޖައްސާ ވަގުތު އިތުރުކިތުރުކުރަމުން ދަނޑަށް ބަދަލުކުރުމުން، ގަސް ފަސޭހައިން ރޯވާނެއެވެ. ދަނޑަށް ބަދަލުކުރުމަށްފަހު ފުރަތަމަ 3-5 ދުވަހު ފަން ހުނގުއްޔެއް ޖަހައި ނިވާކުރުން ރަނގަޅެވެ.
މުޑުވައް ކުރުން:
ރެޑް ލޭޑީ ފަދަ ހައިބްރިޑް ވެރައިޓީތައް ހައްދާއިރު މުޑުވައް ކުރަން ރަނގަޅީ ތައްޔާރީ ޕެކެޓްތަކުން ލިބޭ އޮށުންނެވެ. ހޮލެންޑް ވެރައިޓީއަކީ އޯޕަން ޕޮލިނޭޓަޑް ވެރައިޓީއަކަށްވާތީ، އޭގެ ފަޅޮލުން މުޑުވައް ނަގައިގެން ކާމިޔާބުކަމާއެކު ހެއްދިދާނެއެވެ. އޮށް ނަގަން ރަނގަޅީ ގަހުގައި އިނދެގެން ދޮންވާ ފަޅޮލުންނެވެ. އޮށްތައް ނެގުމަށްފަހު ރީތި ފެންފޮދަކުން ދޮވެލައި، ވައިން ހިއްކާލުމަށްފަހު، އެތެރެ ނުފެންނާނެ އެއްޗެއްގައި ބަންދުކޮށް ފިނިތަނެއްގައި ރައްކާކުރެވިދާނެއެވެ.
ފަޅޯ މުޑުވައް ކުރާނީ ސީޑްލިންގް ޓްރޭ ނުވަތަވަތަ ނާސަރީ ކޮތަޅުގައެވެ. ޓްރޭގައި މުޑުވައް ކުރާނަމަ، ބޭނުންކުރާނީ ބޮނބި ކުނޑިއެވެ. ކޮތަޅުގައި މުޑުވައް ކުރާނަމަ، 3 ބައި ވެއްޔަށް 1 ބައި ކާދު އަދި 1 ބައި ބޮނބިކުނޑީގެ ނިސްބަތުން ފަސް ތައްޔާރުކޮށް، 8x6 އިންޗީގެ ކޮތަޅަށް އަޅައި އޮށް އިންދާނީއެވެ.
މެނޭޖް ކުރުން:
ފަޅޯ އިންދުމަށްފަހު ގަހަށް ރަނގަޅަށް ފެންދީ ބަލަހައްޓަންވާނެއެވެ. މިއީ ބޮޑެތި މޭވާ އަޅާ ގަހަކަށްވާތީ، ކޮންމެ ދުވަހަކުވެސް ބިމުން ފެން އެއްކޮށް ހިނދިގެން ނުދާވަރަށް ތެތްކަން ހިފަހައްޓަންވާނެއެވެ. ގަޑިން ގަޑިއަށް ފެންދިނުމުގެ އިތުރުން، ގަސް ވަށައިގެން މަލްޗް ކުރުމަކީ ރަނގަޅު ކަމެކެވެ.
ގަހުގައި ފަޅޯ ޖަހަން ފަށާއިރު ބައެއްފަހަރު ތަނޑިއަކުން 2-3 ފަޅޯ އަންނާނެއެވެ. ނަމަވެސް ފުރަތަމަ ވަރީގައި ގިނަވެގެން 2 ފަޅޯ ހަރުވިޔަސް، ދެން އަންނަ ތަނޑިތަކުގައި 1 ފަޅޯ ޖެއްސުމަކީ އެންމެ ރަނގަޅު ގޮތެވެ. މިގޮތުން ފަޅޮލުގެ ސައިޒު ރަނގަޅުވެ، ކޮލިޓީ ހިފެހެއްޓުމަށް ފަސޭހަވާނެއެވެ. ހަރުކުރާނެ ފަޅޯ ހޮވާނީ އެ ތަނޑިން އަންނަ ފަޅޮލުގެ ސައިޒު، ބައްޓަން އަދި ހެދެމުންދާ ގޮތަށް ބަލައިގެންނެވެ.
ފަޅޯ ކެނޑުން
ފަޅޯ ކަނޑަން އެންމެ ރަނގަޅީ ފަޅޮލަށް ދޮންކުލަ އަރަން ފެށުމުންނެވެ. އުފުލަންޖެހޭ ދުރުމިނަށް ބަލައި ދޮންކުލަ އަރާ ނިސްބަތް ތަފާތުކުރެވިދާނެއެވެ. ދުރު މާކެޓްތަކަށް ފޮނުވާނަމަ، ފުރަތަމަ ދޮންކުލައިގެ ނިޝާން ފެންނަ ހިސާބުން ކެނޑިދާނެއެވެ. ގޭގައި ކެއުމަށް ބޭނުންކުރާނަމަ، އެއްކޮށް ދޮންވަންދެން ގަހުގައި ބޭއްވިދާނެއެވެ.
ރާއްޖޭގައި ގިނަ ދަނޑުވެރިން ފަޅޯ ކަނޑަނީ އަތުން ބިނދައިގެންނެވެ. މިއީ ފަޅޮލަށް އެންމެ ގެއްލުން ކުޑަކޮށް މިކަން ކުރެވޭނެ ގޮތެވެ. ދަނޑި ފަދަ އެއްޗެހިން ޖަހައި ބިންމައްޗަށް ވައްޓާލުމަކީ ރަނގަޅު އާދައެއް ނޫނެވެ. ފަޅޯ ކެނޑުމަށްފަހު ފެނުން ދޮވެލައި ފިނި ތަނެއްގައި ރައްކާކުރުމުން، ގިނަ ދުވަހު ކޮލިޓީ ހިފެހެއްޓުމަށް ފަސޭހަވާނެއެވެ.
ފަޅޯ އިންދައި ހެއްދުމަކީ ދިވެހިރާއްޖޭގެ މާޙައުލުގައި ފަސޭހައިން ކުރެވޭނެ ކަމެކެވެ. ރަނގަޅު ގޮތުގައި ބިން ތައްޔާރުކޮށް، މުޑުވައް ކުރުމާއި، ނާސަރީ ކުރުމުގެ މަރުޙަލާތައް ރަނގަޅަށް ފުރިހަމަ ކުރުމުން، ފަޅޯ ގަސް ހެއްދުމުގައި ކާމިޔާބު ލިބޭނެއެވެ. އަދި ގަސް ބެލެހެއްޓުމާއި، ފަޅޯއި، ފަޅޯ ކެނޑުމުގައި ސަމާލުކަން ދިނުމުން، ރަނގަޅު ފެންވަރުގެ އުފެއްދުންތެރިކަމެއް ހޯދިދާނެއެވެ.
ފަޅޯ ހެއްދުމަކީ ދަނޑުވެރިންނަށް ރަނގަޅު އާމްދަނީއެއް ލިބޭނެ މަސައްކަތެކެވެ. އަދި މިއީ ޢާއިލާގެ ބޭނުމަށް ނުވަތަ ވިޔަފާރީގެ ބޭނުމަށް ވެސް ކުރެވިދާނެ ކަމެކެވެ. ފަޅޯ ގަހަކީ ނިސްބަތުން ބަލިތަކާއި އާފަތްތަކުގެ އަސަރު ކުޑަ ގަހަކަށްވުމާއެކު، ބެލެހެއްޓުމަށް ފަސޭހަ ގަހެކެވެ. އެހެންކަމުން، ދަނޑުވެރިކަމުގެ ދާއިރާގައި އަލަށް ފަށާ ފަރާތްތަކަށް ވެސް ފަޅޯ ހެއްދުމަކީ އެކަށީގެންވާ ކަމެކެވެ.
ފަޅޯ ގަސް ހެއްދުމުގައި މުހިންމު ކަންތައްތަކުގެ ތެރޭގައި ރަނގަޅު ވައްތަރުގެ އޮށް ނުވަތަ މުޑުވައް ބޭނުންކުރުން، ބިމުގެ ފެންވަރު ރަނގަޅުކުރުން، އެކަށީގެންވާ ގޮތަށް ފެން އަދި ކާނާ ދިނުން، އަދި ގަހުގައި އަޅާ މޭވާގެ އަދަދު ބެލެހެއްޓުން ހިމެނެއެވެ. މި ކަންކަމަށް ސަމާލުކަން ދިނުމުން، ފަޅޯ ގަސް ހެއްދުމުގައި ރަނގަޅު ނަތީޖާއެއް ހާސިލުކުރެވޭނެއެވެ.
