ރޯޑް ޑެވެލޮޕްމަންޓް ކޯޕަރޭޝަން (އާރުޑީސީ) އިން ރާއްޖޭގެ އެކި ސަރަހައްދުތަކުގައި މަގު ހެދުމާއި މަރާމާތު ކުރުމުގެ މަސައްކަތްތައް ދަނީ ކުރަމުންނެވެ. އެގޮތުން އެ ކުންފުނިން މިއަދު މަސައްކަތްތަކުގެ އަދާހަމަ ހިއްސާކޮށްފިއެވެ.
އާރުޑީސީން ދިން މަޢުލޫމާތުގައިވާ ގޮތުން، ތ. ތިމަރަފުށީގައި މަގު ހެދުމުގެ މަޝްރޫޢުގެ ދަށުން ސޯސަން މަގުގައި މަގު ކޮނުމާއި ބެކް ފިލިންގގެ މަސައްކަތް ވަނީ ކުރެވިފައެވެ. އަދި މާލޭ ސިޓީގައި އަމީނީމަގު މާފަންނު ސްޓޭޑިއަމް ސަރަހައްދުގައި ތާރު އެޅިފައިވާ ހިސާބަށް ގެއްލުން ވެފައިވާތީ، އެ ސަރަހައްދު މަރާމާތު ކުރުމުގެ މަސައްކަތުގެ ތެރެއިން އޭބީސީ ފަށަލަ އެޅުމާއި ކޮމްޕެކްޓް ކުރުން އަދި އޭބީސީ ފަށަލަ ޓެސްޓު ކުރުމުގެ މަސައްކަތްވެސް ވަނީ ކުރެވިފައެވެ.
މީގެ އިތުރުން، ކުޅުދުއްފުށީ ސިޓީގައި މަގުތައް ހެދުމުގެ މަޝްރޫޢުގެ ދަށުން ފަރީދީ މަގުގައި ދުވާރުގެ މަސައްކަތް ކުރެވުނު ކަމަށް އާރުޑީސީން ބުނެފައިވެއެވެ. އަދި ޅ. ނައިފަރުގައި ބައެއް މަގުތަކުގައި ވަޅުގަނޑު ހެދި ގެއްލުން ވެފައިވާތީ، ފަސްގަނޑު އެއްވަރުކޮށް ކޮމްޕެކްޓް ކުރުމުގެ މަސައްކަތް އެ ކުންފުނީގެ އިޖުތިމާޢީ ޒިންމާގެ ދަށުން ކުރެވުނު ކަމަށްވެސް އާރުޑީސީން ފާހަގަކޮށްފައިވެއެވެ.
އާރުޑީސީން އިން ރާއްޖޭގެ އެކި ސަރަހައްދުތަކުގެ ރަށްރަށުގެ މަގުތައް ޒަމާނީ ފެންވަރަށް ތަރައްޤީކޮށް، ރަށުގެ ރައްޔިތުންނަށް ކަނެކްޓިވިޓީ އާއި އިންފްރާސްޓްރަކްޗަރ ހަރުދަނާ ކުރުމުގެ މަސައްކަތް މިހާރުވެސް މެދުނުކެނޑި ކުރިއަށް ގެންދެއެވެ. މި މަސައްކަތްތަކަކީ ރާއްޖޭގެ އެކި ކަންކޮޅުތަކުގައި ދަތުރުފަތުރުގެ ނިޒާމު ހަރުދަނާކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށް ކުރެވޭ މުހިންމު މަސައްކަތްތަކެކެެވެ.
