ދިވެހިންގެ އެއަރލައިން "މޯލްޑިވިއަން" ގެ ވައިޑް ބޮޑީ ފްލައިޓް ޗައިނާއިން ރާއްޖެއަށް ކުރި ފުރަތަމަ ދަތުރުގައި 192 ފަތުރުވެރިން ރާއްޖެ އަތުވެއްޖެއެވެ.
މިދަތުރު ކުރީ ޗައިނާގެ ޗެންގްޑޫ އިން މާލެއަށެވެ.
މޯލްޑިވިއަން ފްލައިޓުގައި ގިނަ އަދަދެއްގެ ފަތުރުވެރިން ރާއްޖެ ޒިޔާރަތް ކޮށްފައިވާއިރު، މިދިޔަ އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރީ ޗައިނާއިންނެވެ. އަދި މިއަހަރުގެ މިހާތަނަށް ދެވަނައަށް އެންމެ ގިނަ ފަތުރުވެރިން ރާއްޖެ ޒިޔާރަތް ކުރި ޗައިނާއިންނެވެ.
މޯލްޑިވިއަންގެ ފްލީޓަށް ގެނައި އޭ-300 ގެ 200 ވޭރިއަންޓަކީ ޖުމްލަ 260 މީހުންގެ ޖާގައިގެ މި ބޯޓަކެވެ. މި ބޯޓުގައި ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސް ހިމެނެއެވެ.
މި ފްލައިޓް ޗައިނާގެ ތިން މަންޒިލަކަށް ދަތުރު ކުރާނެއެވެ. އެއީ ޗެންގްޑޫގެ އިތުރުން ބެއިޖިން އާއި ޝެންހާއި އަށެވެ. މޯލްޑިވިއަން ހޮލިޑޭސްގެ ޖެނެރަލް މެނޭޖަރ ރިޒަވޭޝަން އެންޑް ޓިކެޓިން އައިމިނަތު ސަމީހާ މީޑިޔާތަކަށް ވިދާޅުވީ މި ވަގުތު ވައިޑް ބޮޑީ ފްލައިޓް ޗައިނާއަށް އުދުހޭނީ ކޮންމެ ހަފްތާއެއްގެ ހޯމަ، ބުދަ އަދި ހުކުރު ދުވަހު ކަމަށެވެ.
ވައިޑް ބޮޑީ ފްލައިޓް މިއަދުގެ ވަގުތެއްގައި ދަތުރު ކުރާނީ ޗައިނާގެ ވެރިރަށް ބެއިޖިންއަށެވެ. އެއަށްފަހު އަންނަ ހޯމަ ދުވަހު ދަތުރު ކުރާނީ ޝެންހާއީއަށެވެ.
ވައިޑް ބޮޑީ ފްލައިޓް، މޯލްޑިވިއަންގެ ފްލީޓަށް ހޯއްދެވުމަކީ ރައީސް ޑޮކްޓަރ މުހައްމަދު މުއިއްޒުގެ ރިޔާސީ ވައުދެކެވެ. ވައިޑް ބޮޑީ ފުރަތަމަ ފްލައިޓް ގެންނެވި ދުވަހު ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ މިފަދަ ދެވަނަ ބޯޓެއް މިއަހަރުގެ އޮކްޓޫބަރު މަހުގެ ތެރޭގައި ގެންނަވާނެ ކަމަށެވެ.
