ޗައިނާގެ ގާތްގަނޑަކަށް 3 މިލިއަން ރެސްޓޯރެންޓާއި ކެފޭ އަދި އެހެނިހެން ކާބޯތަކެތީގެ ހިދުމަތްދޭ ތަންތަން ފާއިތުވި އަހަރު ބަންދުކޮށްފައިވާ ކަމަށް ރޭޑިއޯ ފްރީ އޭޝިއާ އިން ބުނެފި އެވެ.
މިއިން ގިނަ ތަންތަން ބަންދުކޮށްފައި ވަނީ ބަނގުރޫޓުވުމުގެ ސަބަބުންނެވެ. އަދި ޗައިނާގައި އެންމެ މަގުބޫލު ބައެއް ރެސްޓޯރެންޓް ޗެއިންތަކުން ވަނީ ހަރަދު ކުޑަކުރުމަށްޓަކައި އެތައް ސަތޭކަ ޔުނިޓްތަކެއްވެސް ބަންދުކޮށްފަ އެވެ.
ޑިސެމްބަރު މަހުގެ ކުރީކޮޅު ޓައިވާނުގެ ލީޑިން ކުކުޅު ޗެއިންއެއް ކަމަށްވާ ޒެންގާއޯ ޗައިނާގެ މީސްމީޑިއާ ޕްލެޓްފޯމް ވައިބޯ އަށް ވައިރަލްވީ ޗައިނާގެ ހުރިހާ ފިހާރައެއް ބަންދުކުރާނެ ކަމަށް އިއުލާން ކުރުމުންނެވެ.
ޗައިނާގެ ރެސްޓޯރެންޓު އިންޑަސްޓްރީއިން ބުނާ ގޮތުގައި މިއީ މުޅިން އަލަށް ދިމާވެގެން އުޅޭ ކަމެކެވެ.
މިތަންތަން ބަންދުކުރުމުގެ ސަބަބުން ފެންވަރު މަތީ ރެސްޓޯރެންޓުތަކުން ފެށިގެން ކެފޭއާއި ބެކެރީ، ހޮޓް ޕޮޓް ޗެއިންއާއި، ސްނެކްސް، އަދި ފާސްޓް ފުޑް އައުޓްލެޓް ފަދަ އިންޑަސްޓްރީގެ ކޮންމެ ސެގްމަންޓަކަށް ވެސް އަސަރުކޮށްފައިވެއެވެ.
ރޭޑިއޯ ފްރީ އޭޝިއާއިން ގެނަސްދިން އެއް މިސާލުގައި ބުނެފައި ވަނީ، ބެއިޖިންގައި ހުންނަ މިޝެލިން ސްޓާ ލިބިފައިވާ އިޓަލީ ރެސްޓޯރެންޓް އޮޕެރާ ބޮމްބާނާ ވެސް 2024 ވަނަ އަހަރުގެ އޭޕްރީލް މަހު ބަންދުކޮށްފައިވާ ކަމަށެވެ. އިގްތިސާދުގެ ހާލަތު ވަޒަން ކުރެވެނީ، އެ ރެސްޓޯރެންޓު ބަންދު ކުރިއިރު، މުވައްޒަފުންނަށް ލިބެންވާ އުޖޫރައާއި ސަޕްލައި ކޮށްފައިވާ ފަރާތްތަކަށް ދައްކަން ޖެހޭ ފައިސާ އަދިވެސް ދައްކާފައި ނުވާތީއެވެ.
