ސްޕެނިޝް ސްޕަރ ކަޕް ފައިނަލުގައި މިރޭ ބާސެލޯނާ އަންހެން ޓީމުން ވާދަވެރި ރެއާލް މެޑްރިޑުގެ އަންހެން ޓީމުކޮޅަށް 5 ލަނޑު ޖަހައި ޗެމްޕިއަންކަން ހޯދައިފިއެވެ.
މިމެޗް ބާސެލޯނާ ކާމިޔާބު ކުރީ 5-0 އިންނެވެ.
މިމެޗުގައި ބާސެލޯނާއިން ރެއާލްގެ ގޯލު ހުޅުވާލީ މެޗުގެ 31 ވަނަ މިނެޓުގައެވެ. މި ލަނޑު ކާމިޔާބު ކޮށްދިނީ ކެރޮލީން ގްރަހަމް ހަންސެންއެވެ. ފުރަތަމަ ހާފް ނިމުމުގެ ކުރިން ކައިރިކައިރީގައި ދެލަނޑު ކާމިޔާބުކޮށް ލީޑް ފުޅާކޮށްދިނީ އީވާ ޕެޖޯއެވެ. ދެވަނަ ހާފުގައި ބާސެލޯނާއަށް ލަނޑު ޖަހައިދިނީ ޕެޓްރީސިއާ ގުއިޖައްރޯ އާއި ކެޕްޓަން އެކްސިއާ ޕުޓެލަސްއެވެ.
ބާސެލޯނާގެ އަންހެން ޓީމުން މިރޭ ރެއާލްމެޑްރިޑް ކޮޅަށް 5 ލަނޑު ކާމިޔާބުކޮށް ސްޕެނިޝް ސްޕަރކަޕުގެ އަންހެން ބައިގެ ޗެމްޕިއަންކަން ހޯދިއިރު، މީގެ ދެހަފްތާއެއްހައި ދުވަސްކުރިން ސްޕެނިޝް ސްޕަރ ކަޕުގެ ފިރިހެން ބައިގެ ފައިނަލުގައި ރެއާލް 5-2 އިން ބަލިކޮށް ބާސެލޯނާގެ ފިރިހެން ޓީމުވެސް ވަނީ ޗެމްޕިއަންކަން ހޯދާފައެވެ.
