އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު، ޙާފިޡްކަމުގެ ސަނަދު އަލަށް ހާސިލްކުރި އަލްޙާފިޡް ޒަލަފް ބިން ނާފިޢުއާއި ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ އިސްލާމީ ކަންތައްތަކާ ބެހޭ ވުޒާރާގައެވެ.
މި ބައްދަލުކުރެއްވުމުގައި ވަޒީރު ވަނީ އަލްޙާފިޡް ޒަލަފް ހޯދެއްވި ކާމިޔާބީއަށް މަރުޙަބާ ދަންނަވާ ޤުރުއާނުގެ ރޮނގުން ކުރިއަށް ދިއުމަށް ނަސޭޙަތްތެރިވެލައްވާ ހިއްވަރު ދެއްވާފައެވެ. އަދި ޒަލަފްގެ މި ކާމިޔާބީއަކީ ޤައުމަށް ލިބުނު ފަޚުރެއް ކަމުގައި ވަޒީރު ފާހަގަކުރެއްވިކަމަށް އިސްލާމީކަންތައްތަކާ ބެހޭ ވުޒާރާއިން ވިދާޅުވިއެވެ.
އދ. މަހިބަދޫއަށް އުފަން އަލްޙާފިޡް ޒަލަފް ބިން ނާފިޢު ޙާފިޡް ކަމުގެ ސަނަދު ހާސިލްކުރީ 12 ޖަނަވަރީ 2025 ގައެވެ. ޒަލަފް ޙާފިޡުކަމުގެ ސަނަދު ހާސިލްކޮށްފައިވަނީ 15 ދުވަސްތެރޭ ޤުރުއާނާއި ބެހޭ މަރުކަޒުގެ ޙިފްޡު ކޮމިޓީއަށް ކިޔުއްވާ 1 ވަނަ ދަރަޖައިގައި ފާސްވެގެންކަމަށް އިސްލާމީކަންތައްތަކާ ބެހޭ ވުޒާރާއިން ވަނީ ފާހަގަކޮށްފައެވެ. މިއީ ވަރަށް މަދު ދުވަސްކޮޅެއްގެ ތެރޭގައި ހާސިލްކުރެވުނު ފާހަގަކޮށްލެވޭ ކާމިޔާބީއެކެވެ.
