ތިލަދުންމަތީ ދެކުނުބުރީ ދިއްދޫގައި އެއަރޕޯޓް އަޅުއްވާނެ ކަމަށާއި ދެން އެމަނިކުފާނު ދިއްދޫއަށް ވަޑައިގަންނަވާނީ ފްލައިޓުގައި އެއަރޕޯޓް ހުޅުވަން ކަމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު މިރޭ ވިދާޅުވެއްޖެއެވެ.
ދިއްދޫ ރައްޔިތުންނާ މިރޭ އެރަށުގައި ބައްދަލު ކުރައްވައި ވާހަކަފުޅު ދައްކަވަމުން ރައީސް ވިދާޅުވީ ދިއްދޫ އެއަރޕޯޓުގެ މަސައްކަތް މިއަހަރު ތެރޭގައި ފައްޓަވާނެ ކަމަށެވެ.
ރައީސް ވިދާޅުވީ ދިއްދޫ އެއަރޕޯޓުގެ މަސައްކަތް ތަރުތީބު ކުރެވިފައިވާ ކަމަށެވެ. "އެމްޓީސީސީއާ ބައެއް މަސައްކަތްތައް އަދި ބޭރުގެ ފަރާތަކާއި އެކީގައި ފްރޭމްވޯކް އެގްރިމެންޓެއްގައި ސޮއިކުރެވި ގިނަ މަސައްކަތްތަކެއް ވަނީ ފެށިފައި، ބިން ހިއްކުން ނިންމާ ދެން ކުރަން ޖެހޭ ޝޯވ ޕްރޮޓެކްޝަން އަދި ރަންވޭ މަސައްކަތްތަކާއި އެއަރޕޯޓުގެ އިމާރާތްތަކާއެކު ފެށޭ ހިސާބުން، ބާރު ސްޕީޑުގައި ގެންގޮސް ނިންމަދޭނަމޭ، ނިންމާ ދެން އިރާކުރެއްވިއްޔާ އަޅުގަނޑު މިރަށަށް އަންނާނީ އެ އެއަރޕޯޓަށް ޖައްސާ މަތިންދާ ބޯޓުގައި އެއަރޕޯޓް ހުޅުވަން" ވަރަށް ޖޯޝުގައި ރައީސް ޑޮކްޓަރ މުއިއްޒު ވިދާޅުވިއެވެ.
