ކުރީގެ ސްރީލަންކާ ރައީސް މަހިންދަ ރާޖަޕަކްސަގެ ދެ ދަރިކަލުންނާ ދެކޮޅަށް ޚިޔާނާތާއި ކޮރަޕްޝަންގެ ދަޢުވާތައް އުފުލައިފި އެވެ. ސްރީލަންކާގެ ހައިކޯޓުގައި ބޮޑު ދަރިކަލުން ނަމަލް ރާޖަޕަކްސާއާ ދެކޮޅަށް ދަޢުވާ އުފުލާފައިވެއެވެ. އަދި ދެވަނަ ދަރިކަލުން ޔޮޝިތާ ރާޖަޕަކްސާ ވަނީ ކޮރަޕްޝަންގެ އެހެން މައްސަލައެއްގައި ހައްޔަރުކޮށްފައެވެ.
38 އަހަރުގެ ނަމަލް ރާޖަޕަކްސާއާ ދެކޮޅަށް ދަޢުވާ އުފުލާފައިވަނީ 2015 ވަނަ އަހަރުގެ ކުރިން އިންޑިއާގެ އިންވެސްޓްމަންޓު ކުންފުންޏަކުން ދިން ފައިސާއަށް ޚިޔާނާތްތެރިވެފައިވާ ކަމަށް ތުހުމަތު ކޮށެވެ. ކްރިޝް ހޮޓެލް ޕްރޮޖެކްޓުން 70 މިލިއަން ސްރީލަންކާ ރުޕީސް ނަހަމަ ގޮތުގައި ބޭނުންކުރި ކަމުގެ ތުހުމަތުގައި 2016 ވަނަ އަހަރުގެ ޖޫން މަހު ވެސް އޭނަ ހައްޔަރުކުރެވުނެވެ.
ނަމަލް ރާޖަޕަކްސާ އަކީ ސްރީލަންކާގެ އިންޓަނޭޝަނަލް ރަގްބީ ކުޅުންތެރިއެކެވެ. އޭނާއާ ދެކޮޅަށް ކުރެވޭ ތުހުމަތުގައި ބުނެފައިވަނީ އެ ފައިސާ ބޭނުންކޮށްފައިވަނީ ރަގްބީ ކުޅިވަރު ކުރިއެރުވުމުގެ ނަމުގައި ކަމަށެވެ.
އަނެއްކޮޅުން، އަނެއް ދަރިފުޅު، ޔޮޝިތާ ރާޖަޕަކްސާ ހައްޔަރުކޮށްފައިވަނީ ބިމެއް ގަތުމުގެ މައްސަލައެއްގައި ކޮރަޕްޝަންގެ ތުހުމަތުގައެވެ. އޭނާ ހައްޔަރުކޮށްފައި ވަނީ މިއަހަރުގެ ޖެނުއަރީ 25 ވަނަ ދުވަހުއެވެ.
މި ދެ މައްސަލައަކީވެސް ކުރީގެ ރައީސް މަހިންދަ ރާޖަޕަކްސާގެ ވެރިކަމުގެ ދައުރުގައި ހިނގާފައިވާ ކަމަށް ބެލެވޭ މައްސަލަތަކެކެވެ. މި މައްސަލަތަކާ ގުޅިގެން އިތުރު ތަފްސީލެއް އަދި ހާމަކޮށްފައެއް ނުވެއެވެ.
